جاڭالىقتار
جامبىل وبلىسىندا جانازا نامازىن شىعارۋ ءۇشىن 100 مىڭ تەڭگە سۇراعان
جامبىل وبلىسى سارىسۋ اۋدانىندا جانازا نامازىن شىعارۋ ءۇشىن 100 مىڭ تەڭگە تالاپ ەتىلدى دەگەن اقپارات قوعامدا ۇلكەن رەزونانس تۋدىردى, دەپ حابارلايدى Qandastar.kz.
بۇل تۋرالى العاش بولىپ ايتىسكەر اليك بەكمۋساەۆ الەۋمەتتىك جەلىدە جازبا جاريالاعان. ونىڭ ايتۋىنشا, وسىنداي سوما مارقۇمنىڭ تۋىستارىنان اۋدانعا قاراستى اۋىلداردىڭ بىرىندە سۇرالعان.
مالىمەت ەل ىشىندە قىزۋ تالقىلانىپ, حالىق نارازىلىعىن تۋدىرعان سوڭ, ماسەلەنى جامبىل وبلىسى بويىنشا قازاقستان مۇسىلماندارى ءدىني باسقارماسىنىڭ وكىلدىگى نازارعا الدى. وبلىستىڭ باس يمامى اسقار ساتىعلانوۆ بۇل جاعدايعا قاتىستى رەسمي پىكىر ءبىلدىردى.
“جانازاعا اقى بەلگىلەۋ — شاريعاتقا قايشى. رەسمي تىركەلگەن يمامداردىڭ ەشقايسىسى ءدىني ءراسىم ءۇشىن اقى سۇراۋعا قۇقىلى ەمەس. مۇنداي ارەكەتتەر تەرگەلۋى ءتيىس. مۇمكىن, بۇعان قاتىسى بار ادامدار مۇفتياتپەن بايلانىسى جوق جەكەلەگەن تۇلعالار بولۋى ىقتيمال” — دەدى ول.
يمامنىڭ بۇل مالىمدەمەسى مەشىت پەن حالىق اراسىنداعى سەنىمدى ساقتاۋ جولىنداعى ماڭىزدى قادام رەتىندە قابىلداندى. الايدا قوعام ءالى دە بۇل ماسەلەگە ناقتى جاۋاپ پەن ءتيىستى شارا كۇتەدى. قازىر سارىسۋ اۋدانىنداعى جاعدايدى جەرگىلىكتى بيلىك پەن ءدىني باسقارما وكىلدەرى بىرلەسىپ زەرتتەپ جاتىر. رەسمي دەرەك بويىنشا, اتالمىش ەلدى مەكەندە قىزمەت ەتەتىن يمامداردىڭ ەشقايسىسى جانازا ءۇشىن اقى الۋ تۋرالى نۇسقاۋلىق الماعان.
