Jańa oqý jylynda Qazaqstanda 200-den astam mektep salynady

2025–2026 oqý jylynda 300 myńnan astam oqýshy ornyna eseptelgen 200-den astam jańa mektep salý josparlanyp otyr, dep habarlaıdy Qandastar.kz aqparat portaly. Sonyń ishinde 206 myń oqýshy ornyna arnalǵan 112 mektep «Keleshek mektepteri» ulttyq jobasy aıasynda paıdalanýǵa beriledi. Jańa mektepterdiń jartysyna jýyǵy aýyldarda ornalasady.

Bul jobalardy júzege asyrý qala men aýyl mektepteri arasyndaǵy alshaqtyqty azaıtýǵa, 15 apatty mektep máselesin sheshýge, úsh aýysymdy oqytýdy jáne 150 myńǵa jýyq oqýshy orny tapshylyǵyn joıýǵa múmkindik beredi.

Qosymsha 1000 aýyl mektebinde jóndeý jumystary júrgizilip, jıhaz jańartylady, kitaphanalar, ashanalar men qaýipsizdik júıeleri jabdyqtalady. Sonymen qatar hımııa, fızıka, bıologııa, robototehnıka jáne STEM baǵyttary boıynsha 1000 zamanaýı pándik kabınet satyp alynýda.

Memleket basshysynyń tapsyrmasyna sáıkes, biryńǵaı zamanaýı mektep ınfraqurylymy formatyna kóshý úshin 2029 jylǵa deıin 1231 mektepti jańǵyrtý baǵdarlamasy bastalady. Bıyl 248 mektep renovaııadan ótedi. Bul mektepterde shatyrlar aýystyrylyp, qasbetter men terezeler jańartylady, ınjenerlik jelilerge kúrdeli jóndeý júrgizilip, aýmaq kógaldandyrylyp, abattandyrylady.

Eske sala keteıik, 2019 jyldan bastap Qazaqstanda bilim berý salasynda aýqymdy ınfraqurylymdyq jobalar júzege asyrylyp keledi. Osy ýaqyt ishinde 1200 jańa mektep ashylyp, 1 mıllıonnan astam oqýshy orny qamtamasyz etildi. Bul sharalar mektepterdiń shamadan tys júktemesin jáne úsh aýysymdy oqytýdy aıtarlyqtaı azaıtýǵa múmkindik berdi. Qazirgi tańda 3000 mektep bir aýysymmen jumys isteıdi.