جاڭا زاڭ: كرەديت تولەۋدى كەيىنگە قالدىرۋعا بولادى. ول جەڭىلدىككە كىمدەر يە

Ulysmedia كوللاجى

قازاقستاندا قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ كۇشەيتىلەدى. قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا ءماجىلىس وتىرىسىندا جاڭا زاڭ جوباسى بويىنشا (بۇگىن ءبىرىنشى وقىلىمدا قارالدى) نەسيەنى تولەۋدە كىمدەر جەڭىلدىك الاتىنىن ايتتى, دەپ حابارلايدى Qandastar.kz Ulysmedia.kz سىلتەمە جاساپ.

دەپۋتاتتار باستاماسى

قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا قارجى قىزمەتتەرى بوينىشا تۇتىنۋشىلاردىڭ قۇقىقتارىن قورعاۋدى ودان ءارى كۇشەيتۋ جانە قارجىلىق قولجەتىمدىلىكتى ارتتىرۋ شارالارى ۇسىنىلعانىن ايتتى. اتالعان تۇزەتۋلەرگە پارلامەنت دەپۋتاتتارى باستاماشى بولعان. بۇل رەتتە ەڭ الدىمەن, مۇگەدەكتىگى بار ادامدار مەن حالىقتىڭ الەۋمەتتىك وسال توپتارىنا جاتاتىن ازاماتتاردى قورعاۋعا ەرەكشە نازار اۋدارىلادى.

«قارجى ۇيىمدارىنىڭ مۇمكىندىگى شەكتەۋلى ادامدارعا بيىل 1 شىلدەدەن باستاپ ەنگىزىلگەن قارجى ۇيىمدارى قىزمەتتەرىنىڭ قولجەتىمدىلىك جونىندەگى ۇلتتىق ستاندارتىن ەسكەرە وتىرىپ, قىزمەتتەر كورسەتۋىن قامتاماسىز ەتۋ مىندەتى زاڭنامالىق دەڭگەيدە ەنگىزىلەدى. سونداي-اق قارجى ۇيىمدارىنا مۇمكىندىگى شەكتەۋلى ادامدارمەن جۇمىس ىستەۋدىڭ ىشكى ءتارتىبىن بەكىتۋ مىندەتى جۇكتەلەدى. ولار قارجى ۇيىمدارىنىڭ قىزمەتتەرىن العان كەزدە وزدەرىنە سەنىم بىلدىرىلگەن تۇلعانى تاعايىنداۋ مۇمكىندىگىنە يە بولادى», – دەپ حابارلادى ءمادينا ابىلقاسىموۆا.

جەڭىلدىكتەر كىمدەرگە بەرىلەدى

اگەنتتىك باسشىسى مەرزىمى وتكەن كرەديتتەر بويىنشا بەرەشەكتى رەتتەۋ كەزىندە حالىقتىڭ الەۋمەتتىك وسال توپتارىنا جاتاتىن ادامداردى, سونداي-اق توتەنشە جاعداي سالدارىنان زارداپ شەككەن ازاماتتاردى قوسىمشا قورعاۋ شارالارىنىڭ كوزدەلگەنىن دە اتاپ ءوتتى.

«وسى ساناتقا جاتاتىن ازاماتتار ءۇشىن بەرەشەكتى رەتتەۋ كەزىندە قارىزدار مەن ميكروكرەديتتەر بويىنشا تولەم مەرزىمىن مىندەتتى تۇردە كەمىندە 3 اي مەرزىمگە كەيىنگە قالدىرۋ, سونداي-اق اي سايىنعى تولەمدى 50 جانە ودان دا كوپ پايىزعا ازايتۋ كوزدەلەدى. قارىز الۋشى-جەكە تۇلعالاردىڭ قۇقىقتارىن قورعاۋ ءۇشىن بانكتىك قارىزداردى مەرزىمىنەن بۇرىن وتەگەنى ءۇشىن ايىپاقى الۋعا تىيىم سالىنادى. ميكروكرەديتتى قايتارماعانى ءۇشىن ايىپاقىنى قوسپاعاندا, ازاماتتاردىڭ ميكروكرەديتتەرى بويىنشا كەز كەلگەن ايىپاقى ءوندىرىپ الۋعا تىيىم سالىنادى.

بانكتىك قارىز نەمەسە ميكروكرەديت الۋ ءۇشىن جاسالاتىن ساقتاندىرۋ شارتتارى بويىنشا ساقتاندىرۋ اگەنتى كوميسسياسىنىڭ شەكتى مولشەرى  10% شەگىندە بەلگىلەنەدى. تۇتىنۋشىلاردى ماجبۇرلەپ جۇكتەلگەن قارجى ونىمدەرىنەن قورعاۋ ماقساتىندا, قارجى ۇيىمدارىندا قارجى ونىمدەرىن ازىرلەۋ مەن ەنگىزۋدىڭ ىشكى راسىمدەرىنىڭ بولۋ تالابى ەنگىزىلەدى», – دەپ حابارلادى قنردا توراعاسى.

ءمادينا ابىلقاسىموۆا تۇتىنۋشىلاردىڭ ۋاقتىلى كەرى بايلانىس الۋى ءۇشىن قارجى ۇيىمدارىنىڭ كليەنتتەردىڭ وتىنىشتەرىن 15 جۇمىس كۇنى ىشىندە قاراۋ مەرزىمىنىڭ زاڭنامالىق تۇرعىدان بەلگىلەنەتىنىن اتاپ ءوتتى.

زاڭ جوباسى مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن, «ەكونوميكانى ىرىقتاندىرۋ جونىندەگى شارالار تۋرالى», «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىقتارىن ىسكە اسىرۋ ءۇشىن ازىرلەندى.