«جانۇياسىن ساعىنىپ ءجۇردى»: ينديرا ەلەمەس مارقۇم ارمان دۇيسەنوۆتىڭ ستۋديادا جان تاپسىرعانىن ايتتى

فوتو: ۆيدەودان كادر

بەلگىلى ءانشى ينديرا ەلەمەس مارقۇم كومپوزيتور, سازگەر ارمان دۇيسەنوۆتىڭ سوڭعى ساتىندە جانىندا بولعانىن ايتتى, دەپ حابارلايدى Skifnews.kz اقپارات پورتالى.

ونەر يەسى «استارلى اقيقات» باعدارلاماسىنا كەلىپ, مارقۇمنىڭ سوڭعى ءسوزىن دە ايتىپ بەردى.

«جۇرەگى توقتاپ, ءبىر ساتتە كەتىپ قالدى. قاتتى قينالىپ, اۋىرعان دا جوق. وسى ستۋديادا بولدى. قاسىنداعى جىگىتتەردىڭ ايتۋىنشا, سۋ ءىشىپ, جاتىپ قالعان. سودان ويانباعان. تاڭعى 9-دار شاماسىندا ءجۇرىپ كەتكەن. سوڭعى دەمى قالعانشا ەكەۋمىز ستۋديادا ءان جازدىق. اعالى-قارىنداس بولىپ ارالاساتىن ەدىك. ءتىپتى جانازاسىن ءوزىمنىڭ ۇيىمنەن شىعارعىم كەلدى. بىراق يمامدار رۇقسات ەتپەدى. جان تاپسىرعان ستۋديادان ورتالىق مەشىتكە الىپ كەتتى. بۇل تاقىرىپتا اڭگىمە ايتۋ ماعان قيىن. بىراق اقيقاتى وسى», – دەدى ءانشى.

ونەر يەسى كومپوزيتوردىڭ وتباسىمەن بولەك تۇراتىنىن دا جاسىرمادى.

«سوڭعى كەزدە جانۇياسىن قاتتى ساعىنىپ جۇرگەنىن ايتتى. بالا-شاعاسى مەن ايەلىن ءجيى ايتا بەرەتىن. قانشا ۋاقىت وتسە دە, ءالى دە ۇمىتا المايمىن. ەشكىمدى سوككىم كەلمەيدى. بىراق سونداي تۇلعانىڭ جانازاسىن شىعارۋعا كەلگەندە ۇلكەن سۇراق بولىپ قالۋى وتە وكىنىشتى. نە ايتارىمدى دا بىلمەيمىن?! «ءۇي بولماسا, مەنىڭ ۇيىمنەن شىعارايىق» دەپ ايتقانىم راس. ارمان اعا وتباسىن قاتتى جاقسى كورەتىن. قىزى لوندوندا وقيتىن ەدى, سونى ۋايىمدايتىن. ءبىر كۇنى « ۇلىم ابىلاي مەنىڭ ورنىمدى باسادى. ول مەنىڭ ءىزىمدى جالعاستىرادى. ايسۇلۋ دا كەرەمەت كەلىنشەك. سول قالپىندا جاقسى كورەمىن» دەپ ايتتى. سول كەزدە كەتەتىنىن سەزدىردى. بىراق ءبىز تىيىپ تاستاپ وتىردىق», – دەدى ونەر يەسى.

ايتا كەتەيىك, باعدارلاما ۇجىمى مارقۇمنىڭ وتباسى ستۋدياعا كەلۋدەن باس تارتقانىن ايتتى.