«جاپ-جاس قىزدى ءتورتىنشى ايەلى قىلعان»: اتىشۋلى يمامنىڭ جەكە ومىرىنە قاتىستى اقپار شىقتى

تيك-توك الەۋمەتتىك جەلىسىندە يمام جارقىن مىرزاتاي 4-ايەل الدى دەگەن اقپارات تارادى, دەپ حابارلايدى qandastar.kz اقپاراتتىق پورتالى Orda.kz-كە سىلتەمە جاساپ.

بەلگىسىز TikTok قولدانۋشىسى ءوز پاراقشاسىنا جارقىن مىرزاتايمەن تۇسكەن جاس قىزدىڭ سۋرەتىن جاريالاپ, ەكەۋىنىڭ ۇيلەنگەنى تۋرالى جازعان بولاتىن.

«بەلگىلى يمام جارقىن مىرزاتاەۆ جاپ-جاس ايەل الىپتى. مىنە, ەسىمى نۇرعانىم ەكەن. 2005 جىلعى قۇتتى بولسىن. ەندى مىناۋ ءتورتىنشىسى. 3 ايەلىنەن 17 بالا بار», — دەپ جازدى ول.

سكرين: orda.kz

بۇل اقپاراتقا فاكتچەك جاساۋ ماقساتىندا Orda.kz جارقىن مىرزاتايدىڭ وزىنە حابارلاستى. يمامنىڭ ايتۋىنشا, بۇل اقپارات جالعان.

«بۇل تاڭىرشىلدەردىڭ ىستەپ وتىرعاندارى. مەن تۋرالى ولار 2 كۇن سايىن جازىپ وتىرادى. بۇعان دەيىن «ءولدى», «اۋرحاناعا ءتۇستى», «سوتتالدى» دەگەن اقپاراتتار تاراعان بولاتىن», – دەدى جارقىن مىرزاتاي.

سونداي-اق يمام قاسىندا تۇرعان قىزدىڭ كىم ەكەنىنە دە تۇسىنىكتەمە بەردى.

«سۋرەتتەگى ءوزىمىزدىڭ فيرمامىزدا بىرگە قىزمەت اتقاراتىن نۇرعانىم ەسىمدى قارىنداسىمىز. ول اقپارات جالعان. ونداي بەينەلەردەن تاعى بىرەۋى دە كەلىپ تۇر. «جارقىن مىرزاتاي بۇكىل قازاقتىڭ ءسوزى اراب تىلىنەن اۋدارىلعان» دەگەن, سوسىن «جارقىن مىرزاتايدىڭ ايلىعى 900 000 تەڭگە ەكەن. ول سوعان ءماز بولىپ وتىر» دەگەن اقپاراتتار تاراپ جاتىر. ءوزىمىزدىڭ ۇيدە نە بولىپ جاتقانىن سولاردان ەستىپ وتىرمىز», – دەپ تۇيىندەدى ول.