جاساندى ينتەللەكت اسكەردەگى الىمجەتتىكتەن قالاي قۇتقارادى?

قورعانىس ۆيتسە-ءمينيسترى دارحان احمەديەۆ اسكەري قىزمەتشىلەر بەينەباقىلاۋ مەن جاساندى ينتەللەكت ارقىلى قالاي باقىلاناتىنى تۋرالى ايتتى, دەپ حابارلايدى qandastar.kz  Orda.kz-كە سىلتەمە جاساپ.

دارحان احمەديەۆ جۋرناليستەردىڭ اسكەردەگى الىمجەتتىك پەن زورلىق-زومبىلىق ماسەلەسىن قالاي شەشەتىنى تۋرالى سۇراعىنا جاۋاپ بەرە وتىرىپ, اسكەري بولىمدەردە بەينەباقىلاۋ جۇيەسىن جەتىلدىرىپ جاتقاندىعىن ايتتى.

«قازىر كامەرالارعا تۇسپەيتىن جەرلەردى زەرتتەپ جاتىرمىز. ءبىز اسكەري پوليتسيا باسقارماسىمەن بىرلەسىپ جۇمىس ىستەپ, قانداي ايماقتار كامەرالارمەن قامتىلۋى كەرەكتىگىن انىقتايمىز. بۇيرىققا وزگەرىستەر ەنگىزەمىز, سودان كەيىن ول اسكەرگە جىبەرىلەدى, ولار ءوز عيماراتتارىن جاڭا نورمالارعا سايكەستەندىرەدى», — دەدى ۆيتسە-مينيستر.

سونىمەن قاتار, احمەديەۆتىڭ ايتۋىنشا, «الىمجەتتىك ايماعى» سانالاتىن جۋىناتىن بولمە مەن  دارەتحانا سياقتى ورىندارعا ەرەكشە نازار اۋدارىلادى. مۇنداي جەرلەردە ساربازداردى جاساندى ينتەللەكت باقىلايدى.

سونداي-اق, دارەتحانالارعا كامەرا ورناتىلمايدى. بىراق ءوتۋ جولىندا كامەرالار ورناتۋ قاراستىرىلادى. قازىر بەينە اعىندارىن تالداۋ ءۇشىن جاساندى ينتەللەكت ەنگىزىلۋدە. اسكەري قىزمەتشىلەردىڭ ءبىر جەردە ۇزاق ۋاقىت تۇرۋى نەمەسە ادامداردىڭ جينالۋى, 2-3 نەمەسە ودان دا كوپ ادامنىڭ وسى ورىندارعا ءبىر ۋاقىتتا كىرۋى, كىرگەن جەرلەرىنەن ۇزاق ۋاقىت شىقپاي قالعاندا جۇيە ءبولىم كەزەكشىسىنە بەلگى بەرەدى ەكەن. ال دابىل تۇسكەن جاعدايدا بەينە جازبا اۆتوماتتى تۇردە اسكەري پوليتسيا ورگاندارىنا جىبەرىلەدى.