«جاستار شارشاماي ما?»: الماتىنىڭ اۆتوبۋسىندا ۇلكەن كىسىلەر مەن بويجەتكەندەر ورىن ءۇشىن داۋلاسقان

فوتو: اشىق دەرەككوز

Tiktok الەۋمەتتىك جەلىسىنە ۆيدەو جۇكتەگەن اۆتور الماتىداعى اۆتوبۋس ىشىندە بولعان داۋدى باستان-اياق بايانداعان, دەپ حابارلايدى qandastar.kz Azattyq Rýhy سايتىنا سىلتەمە جاساپ. 

ۇلكەن ەر ادام ءۇشىن ورىن سۇراعان ايەل ادام جاستاردى تابالاپ, ەكى قىزعا «ۇياتسىز ەكەنسىڭدەر» دەپ داۋىس كوتەرىپ, ايقاي سالادى. جاستار بولسا, اۆتوبۋستا ەشكىم ەشكىمگە ورىن بەرۋگە مىندەتتى ەمەس ەكەنىن العا تارتقان.

«كوپ ءومىر ءسۇرىپ قويدىڭدار ما? كوپ كوردىڭدەر مە? بۇل – ۇيدەگى تاربيەدەن ەمەس, ادامنىڭ ساناسىنا بايلانىستى نارسە. مەنىڭ قىزىم ەشقاشان اۆتوبۋستا ۇلكەن كىسىلەرگە ورىن بەرمەي وتىرمايدى», – دەيدى جاستاردى كىنالاعان ايەل.

ۆيدەوعا پىكىر جازعاندار ەكى بويجەتكەنگە اقىل ايتىپ, ايەلدى سوتقا بەرۋگە بولادى دەيدى. سەبەبى قوعامدىق ورىنداردا ەشكىم ەشكىمنىڭ ار-وجدانىنا تيە المايدى.

«جاستار شارشاماي ما? ايتارعا ءسوزىم جوق. مادەنيەتتى تۇردە «قىزىم, ورىن بەرشى» دەسە, كەز كەلگەن ادام قابىلداپ, ورنىن ۇسىنار ەدى. ءبىز دە تاڭەرتەڭ كەپتەلىستە تۇرماس ءۇشىن ەرتە 5-6-دا شىعىپ, ساباعىمىزعا بارىپ, كەيىن جۇمىستان كەشكە ۇيگە قايتاردا اۆتوبۋستا وتىرىپ بارعىمىز كەلەدى. تاربيەسىنە, اتا-اناسىنا ءتىل تيگىزگەنى دۇرىس پا? ايەلدى ايەل تۇسىنبەسە, كىم تۇسىنەدى?», – دەپ جازدى حالىق.