Jańalyqtar
Jazda elimizdiń biraz bóliginde órt qaýpi joǵary – Qazgıdromet
Sınoptıkterdiń aıtýynsha, mamyr aıynan bastap jazǵy mezgilde Qazaqstannyń basym bóliginde órt qaýpi joǵary. Sebebi uzaq ýaqyt jaýyn-shashyn túspeı, kún ystyq bolmaq.
Árıne, bul – boljam ǵana. Apat aıtyp kelmeıdi. «Bári Jaratqannyń qolynda» dep jatamyz. «Qazgıdromet» RMK gıdrometeorologııalyq ortalyǵynyń dırektory Marına Shmıdttiń aıtýynsha, atalǵan mekeme tabıǵı órttiń týyndaý jaǵdaılaryn ǵana boljaıdy.
«Qar jamylǵysy erigen sátten bastap turaqty jańbyrly aýa raıy bastalǵanǵa deıin nemese qar jamylǵysy paıda bolǵanǵa deıin, ıaǵnı 15 sáýirden 15 qazanǵa deıin órt qaýpi boljamy shyǵarylady. Jaýyn-shashynsyz aýa raıy jáne joǵary aýa temperatýra saqtalǵan ýaqytta «Qazgıdromet» órt qaýiptiligi týraly eskertýlerdi barynsha ýaqtyly (1-7 táýlik aldyn ala) shyǵarýǵa tyrysady. Eskertýler barlyq memlekettik organdarǵa, tótenshe jaǵdaılardy basqarý ortalyqtaryna, qalalardyń, oblystardyń ákimdikterine jáne basqa da múddeli organdarǵa jedel jetkiziledi», — dedi ol.
«Qazgıdromet» RMK uzaq merzimdi aýa raıy boljamyna sáıkes, mamyr jáne maýsym aılarynda aýa temperatýrasy klımattyq normadan 1-2° joǵary bolady dep kútilip otyr. Shilde jáne tamyz aılarynda temperatýra qalypty deńgeıde bolady. Mamyr jáne jaz mezgilinde jaýyn-shashyn mólsheri elimizdiń basym bóliginde qalypty jaǵdaıda nemese odan az bolady dep boljanǵan.
