جازعى دەمالىس. بالالار قاۋىپسىزدىگى قالاي قامتىلادى

بيىل ءتۇرلى لاگەرلەردە 109 مىڭنان استام وقۋشى تىنىعادى. جالپى وقىتۋ قورى ەسەبىنەن الەۋمەتتىك ءالجۋاز توپتارعا جاتاتىن وتباسىلاردىڭ 12 مىڭنان استام ۇل-قىز قالا سىرتىنداعى جانە مەكتەپالدى لاگەرلەرىندە دەمالادى. بۇعان 235 ملن تەڭگە ءبولىندى.

وبلىس بويىنشا 11 مەملەكەتتىك لاگەر ىسكە قوسىلادى. جازعى دەمالىس باستالعانعا دەيىن ءتيىستى تەكسەرۋ جۇمىستارى باستالدى. توتەنشە جاعداي, سانيتارلىق-ەپيدەميولوگيالىق باقىلاۋ قىزمەتى ماماندارى نىسانداردىڭ دايىندىعىن پىسىقتادى.

زەرتحانالىق باقىلاۋ اياسىندا ماۋسىمدىق لاگەرلەردىڭ بارلىعىنداعى ويىن جانە سپورت الاڭدارىنان 42 قۇم سىناماسى الىندى. سونىمەن قاتار وزەن-كول ماڭىنداعى لاگەرلەردىڭ سۋ ايدىندارىنان 37 سۋ سىناماسى الىندى. تەكسەرىلگەن سىنامالار نورماعا سايكەس. بۇگىندە جىل بويى جۇمىس ىستەيتىن قالا سىرتىنداعى لاگەرلەرگە سانيتارلىق-ەپيدەميولوگيالىق قورىتىندى بەرىلدى. قالعان ورىندارعا دايىندىق جۇمىستارى ءجۇرىپ جاتىر. قاۋىپسىزدىك شارالارى شەڭبەرىندە دەزينسەكتسيالىق, جوندەۋ, دەزينفەكتسيالىق, اباتتاندىرۋ جۇمىستارى قولعا الىندى, – دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلنار اقىلبەكوۆا.

جازعى دەمالىس كەزىندە ىشكى ىستەر ورگاندارى جازعى لاگەرلەردىڭ قاۋىپسىزدىگىن باقىلايدى. ماۋسىم باستالعان ساتتەن باستاپ ءار نىسانعا ۋچاسكەلىك ينسپەكتورلار بەكىتىلەدى. بالالار تاسىمالى دا پوليتسەيلەردىڭ ءجىتى باقىلاۋىندا بولماق. ال جەتكىنشەكتەردىڭ سۋداعى قاۋىپسىزدىگىن قامتاماسىز ەتۋ ماقساتىندا رەيدتىك شارالار جۇرگىزىلەدى. توتەنشە جاعداي قىزمەتىنىڭ وكىلدەرى ايماقتاعى 47 لاگەردەگى قاۋىپسىزدىكتى قاداعالايدى.