جەمقورلاردان تاركىلەنگەن اقشاعا سالىنعان جانە جەمقورلىق سالدارىنان ساپاسىز بولعان مەكتەپتەر

مەملەكەت قارجىسىن جىمقىرعان جەمقورلاردان اقشا تاركىلەنىپ, مەكتەپتەر سالۋعا جۇمسالۋى ءتيىس» دەگەن بولاتىن پرەزيدەنت قاسىم-جومارت توقاەۆ. سوڭعى كەزدە جەمقورلاردان تاركىلەنگەن اقشاعا سالىنعان مەكتەپتەر تۋرالى ايتىلا باستادى. استاناداعى سونداي مەكتەپتىڭ بىرىنە پرەزيدەنتتىڭ ءوزى دە باردى. سونىمەن نەشە مەكتەپ سالىندى, نەشە مەكتەپتىڭ قۇرىلىسى اياقتالدى? امانگەلدى سەيىتحان تارقاتادى.  

امانكەلدى سەيتحان, ءتىلشى:

بۇل جەمقورلاردان تاركىلەنگەن قارجىعا سالىنعان استاناداعى مەكتەپتەردىڭ ءبىرى – 96-شى گيمنازيا. 4 قاباتتى عيمارات سىرتىنان وتە ادەمى, كوز تارتادى. ال ءىشى قانداي ەكەنىن كورەيىك…

مۇندا كىرسەڭ, قايتادان مەكتەپتە وقىعىڭ كەلەدى. كەرەكتىڭ ءبارى بار. فەيس-ايدي جۇيەسى, ەلەكتروندى كەستە, اۆتوماتتاندىرىلعان كىتاپحانا. سوڭعى ۇلگىدەگى باعدارلامالاۋ زەرتحاناسى, روبوتوتەحنيكا كابينەتى.

زەرە كەنە, وقۋشى:

مەن قاراعاندى وبلىسىنداعى ءنومىرى №2 مەكتەپتە وقىدىم. سول جەردەن استاناعا كوشىپ, وسى گيمنازيادا وقىپ جاتىرمىن.

2400 ورىندىق ءبىلىم ورداسى مەكتەپ جەتىسپەۋشىلىگى ماسەلەسىن دە ءبىرشاما ازايتقان.

ساۋلە تەمەنوۆا, №96 مەكتەپ-گيمنازيا ديرەكتورى:

3-اۋىسىمدا وقىپ جاتقان ءنومىرى 84 پەن 85-ءشى مەكتەپتىڭ وقۋشىلارىن قابىلدادىق.

مەكتەپتىڭ ءبىر باعىتى – ينكليۋزيۆتى ءبىلىم. بۇگىندە مۇندا 30 ەرەكشە بالا بار.

نازىم ابىلقاسىموۆا, ينكليۋزيۆتى ءبىلىم بەرۋ بويىنشا كوورديناتور:

ەمدىك دەنە شىنىقتىرۋ كابينەتى قۇرىلىس كومپانياسىمەن جابدىقتالعان. ال مىناۋ پسيحولوگيا كابينەتى مەن قولداۋ قىزمەتىن مەكتەپتىڭ ءوزى اقىرىنداپ جابدىقتاپ جاتىر.

قابىرعالارى دا ادەمى بەزەندىرىلگەن. ۇزىلىستە بالالار دالىزدە شاحمات ويناپ, شىعارمالار وقيدى.

البينا قالماحان, وقۋشى:

سپورت زالى دا وتە ەرەكشە. مەكتەپ وتە ەرەكشە سالىنعان. كاراتە, قازاق كۇرەستەرى قاراستىرىلعان. وتە كوپ سپورت ءتۇرى بار, اپايلارى دا وتە مەيىرىمدى.

امانكەلدى سەيتحان, ءتىلشى:

مەكتەپ قاۋىپسىزدىك تالاپتارىنا دا تولىقتاي ساي دەۋگە بولادى. مىسالى, استانادا بىلتىر وسىنداي باسپالداقتان وقۋشى قۇلاپ كەتكەن بولاتىن. ال بۇل مەكتەپتە باسپالداقتاردىڭ بارلىعى جان-جاعىنان قورشالعان. بىراق سول قورشاۋعا مىنا راكۋرستان قاراساڭىز, تەمىر توردى ەسكە تۇسىرەدى. وسىنداي جاقسى, جايلى مەكتەپتەر سالىنۋ ءۇشىن قانشا ادام تەمىر توردىڭ ارتىندا وتىر ەكەن دەپ تە ويلايسىڭ.

جەمقورلاردان قايتارىلعان قارجىعا مەكتەپتەر سالۋ ءۇشىن ارنايى قور قۇرىلعان. سودان بەرى 150 ملرد تەڭگە جيناقتالىپتى.