جەرگە كەتكەن ميلليوندار – ارىسقا جاقىن القاپتا قاربىز شاشىلىپ جاتىر

فوتو: ۆيدەو كادرى

بەلگىلى شىعىستانۋشى, «وتباسى حرەستوماتياسى» جوباسىنىڭ اۆتورى سانجار كەرىمباي ءوزىنىڭ تۋعان اۋىلىنىڭ كىرەبەرىسىندەگى القاپتا قاربىزدىڭ ەش كادەگە جاراماي, تەككە شاشىلىپ جاتقانىنا قىنجىلىس ءبىلدىرىپ, شارۋالاردى وسىنداي كۇيگە جەتكىزگەن جەرگىلىكتى بيلىكتى كىنالادى, دەپ حابارلايدى qandastar.kz Ulysmedia.kz سىلتەمە جاساپ حابارلايدى. 

س.كەرىمباي ۆيدەودا ايتقانداي اۋىلى تۇركىستان وبلىسىندا, ارىس پەن شاۋىلدىرگە بارار ۇلكەن جولدىڭ بويىندا ورنالاسقان.

اۋىلدى جاعالاي جاتقان اتشاپتىرىم القاپتا الىپ قاربىزداردىڭ جينالماي, تۇككە جارامسىز ءراسۋا بولىپ جاتقانى كورىنەدى.

“مىنا جاتقان – بۇل جاقتىڭ تىلىمەن ايتقاندا داربىز, كىتاپتىڭ تىلىمەن ايتساق – قاربىز. بۇل قاربىزدىڭ ءبارى نارىقتىڭ رەتتەلمەۋىنە بايلانىستى ساتىلماي قالىپ, تيىنعا عانا باعالانىپ قالعان. ءسويتىپ ديقاندار بانكروتقا ۇشىرادى. امالسىزدان تاستاپ كەتكەن, ونى نە مال جەمەيدى, نە ادام كەرەك قىلىپ جاتقان جوق”, دەگەن ۆيدەو اۆتورى مۇنى جەرگە تەككە شاشىلعان ميلليوندارعا باعالادى.

ايتۋىنشا, ۇشى-قيىرى كورىنبەيتىن القاپ ارىسقا دەيىن سوزىلىپ جاتقان كورىنەدى.

دەسە دە بۇل القاپتىڭ نەلىكتەن جينالماي قالعانى بەلگىسىز. ۆيدەو اۆتورى دا ونى اشىپ ايتپادى.

“كىم بىلەدى, بالكىم رەسەي-ۋكراينا سوعىسى اسەر ەتتى مە ەكەن? انىعىن ءبىر اللا بىلەدى. بىراق ەندى ديقاندارعا وبال بولعانى انىق. ەشقانداي مەحانيزم مۇنى رەتتەي الماعان,” – دەيدى س.كەرىمباي.