Jertólege qamap, qysym kórsetken: Qazaqstanda aqsha bopsalaýmen aınalysqan qylmystyq toptar ustaldy

Foto: ashyq derekkóz

Oralda ózderin quqyq qorǵaý organdarynyń qyzmetkerleri retinde kórsetken bir top jigit oqý oryndarynyń biriniń stýdentinen 500 myń teńge bopsalaǵan. Bul týraly qandastar.kz  aqparat agenttigi Polisia.kz portalyna silteme jasap habarlaıdy.

Ishki ister mınıstrliginiń málimetinshe, sońǵy úsh kúnde úsh qylmystyq toptyń zańsyz áreketi toqtatylǵan.

“Oralda uıymdasqan qylmysqa qarsy kúres bólinisiniń qyzmetkerleri ózderin quqyq qorǵaý organdarynyń qyzmetkerleri retinde kórsetip, zorlyq-zombylyqpen oqý oryndarynyń biriniń stýdentinen 500 myń teńge bopsalaǵan jergilikti jastar tobyn ustady. Kúdiktiler qamaýǵa alyndy”, – delingen habarlamada.

Mınıstrlik basqa qalalarda da quqyq buzýshylyq bolǵanyn jetkizdi.

“Shymkentte jedel ýákilder qalanyń eki turǵynyn ustap, ýaqytsha ustaý ızolıatoryna qamady. Ustalǵandar jergilikti turǵynnan bir mıllıon teńge bopsalap, oǵan qatysty aqparat taratamyz dep qorqytqan.

Aqtóbede uıymdasqan qylmysqa qarsy kúres bólinisiniń qyzmetkerleri bir mıllıon teńge men Subaru avtokóligin alý kezinde qylmystyq toptyń múshesin ustady. Ol óziniń úsh sybaılasymen ǵımarat jertólesinde jábirlenýshige moraldyq jáne fızıkalyq qysym kórsetip, segiz mıllıon teńge bopsalaǵan. Sotqa deıingi tergeý júrgizilýde. Bopsalaý faktilerin anyqtaý jáne olardyń aldyn alý jumystary jalǵasady”, – dedi IIM uıymdasqan qylmysqa qarsy kúres departamentiniń basqarma bastyǵy Qýandyq Alpys.