جەزقازعاندا بولعان جارىلىستان 5 ادام زارداپ شەككەنى انىقتالدى

فوتو: ۆيدەو كادر

دەمالىس كۇندەرى جەزقازعان-ساتپاەۆ تاس جولىندا ورنالاسقان مۇناي بازاسىندا ءورت شىعىپ, بىرنەشە رەت جويقىن جارىلىس بولدى. سالدارىنان 5 ادام زارداپ شەكتى, دەپ حابارلايدى qandastar.kz  اقپارات پورتالى كتك ارناسىنا سىلتەمە جاساپ.

مۇناي بازاسىندا جانارماي مەن گاز تاسيتىن ارنايى كولىكتەر ورتەنگەن. قۇتقارۋشىلار وقيعا ورنىنا جەتەمىن دەگەنشە نىساندا بىرنەشە رەت جارىلىس بولدى. سوڭعى جارىلىستىڭ جويقىن بولعانى سونشالىق انگار وپىرىلىپ ءتۇستى. انگاردىڭ ىشىندە گاز تولى تسيستەرنا بولعان دەگەن بولجام بار.

ء“بىر بريگادا جالىندى ءسوندىرىپ جاتقاندا, ەكىنشى بريگادا رەزەرۆۋارلارداعى وتىندى سالقىنداتىپ, ءورتتىڭ وعان جەتۋىنە جول بەرمەۋگە تىرىستى. مۇناي بازاسىنىڭ 100 شارشى مەترى جانىپ كەتتى. توتەنشە جاعدايدىڭ سەبەپتەرى انىقتالىپ جاتىر”, – دەلىنگەن حابارلامادا.

وقيعا ورنىندا بولىپ, كۇيىك پەن جاراقات العان بەس ادام اۋرۋحاناعا جەتكىزىلدى. ولاردىڭ ەكەۋى باس سۇيەك-مي جاراقاتىن الىپ, ميى شايقالعان دەگەن دياگنوز قويدى. تاعى ءۇش ادام دارىگەرلەردىڭ باقىلاۋىندا قالدى.

“ەكى ناۋقاس ءارتۇرلى كۇيىك جاراقاتتارىمەن تراۆماتولوگيا بولىمىنە جاتقىزىلدى. قازىر ولاردىڭ جاعدايى تۇراقتى. سونداي-اق بىر ناۋقاس جانساقتاۋ بولىمىنە جاتقىزىلدى. ءومىرىن ساقتاپ قالۋ ءۇشىن شۇعىل وتا جاسالدى. بۇگىن ەكىنشى وتا جاسالىپ جاتىر”, – دەدى جەزقازعان كوپسالالى اۋرۋحاناسىنىڭ ديرەكتورىنىڭ ورىنباسارى شاحرۋح يۋلداشەۆ.

دارىگەرلەر جانساقتاۋ بولىمىندە جاتقان ناۋقاستىڭ جاعدايىن اۋىر دەپ باعالادى.