Jezqazǵanda bolǵan jarylystan 5 adam zardap shekkeni anyqtaldy

Foto: vıdeo kadr

Demalys kúnderi Jezqazǵan-Sátpaev tas jolynda ornalasqan munaı bazasynda órt shyǵyp, birneshe ret joıqyn jarylys boldy. Saldarynan 5 adam zardap shekti, dep habarlaıdy qandastar.kz  aqparat portaly KTK arnasyna silteme jasap.

Munaı bazasynda janarmaı men gaz tasıtyn arnaıy kólikter órtengen. Qutqarýshylar oqıǵa ornyna jetemin degenshe nysanda birneshe ret jarylys boldy. Sońǵy jarylystyń joıqyn bolǵany sonshalyq angar opyrylyp tústi. Angardyń ishinde gaz toly ısterna bolǵan degen boljam bar.

“Bir brıgada jalyndy sóndirip jatqanda, ekinshi brıgada rezervýarlardaǵy otyndy salqyndatyp, órttiń oǵan jetýine jol bermeýge tyrysty. Munaı bazasynyń 100 sharshy metri janyp ketti. Tótenshe jaǵdaıdyń sebepteri anyqtalyp jatyr”, – delingen habarlamada.

Oqıǵa ornynda bolyp, kúıik pen jaraqat alǵan bes adam aýrýhanaǵa jetkizildi. Olardyń ekeýi bas súıek-mı jaraqatyn alyp, mıy shaıqalǵan degen dıagnoz qoıdy. Taǵy úsh adam dárigerlerdiń baqylaýynda qaldy.

“Eki naýqas ártúrli kúıik jaraqattarymen travmatologııa bólimine jatqyzyldy. Qazir olardyń jaǵdaıy turaqty. Sondaı-aq bir naýqas jansaqtaý bólimine jatqyzyldy. О́mirin saqtap qalý úshin shuǵyl ota jasaldy. Búgin ekinshi ota jasalyp jatyr”, – dedi Jezqazǵan kópsalaly aýrýhanasynyń dırektorynyń orynbasary Shahrýh Iýldashev.

Dárigerler jansaqtaý bóliminde jatqan naýqastyń jaǵdaıyn aýyr dep baǵalady.