جولدارىمىز ساپاسىز ەمەس, كۇتىم كورمەگەن – دارحان يماناشەۆ

«قازاقستانداعى جولداردىڭ 90 پايىزعا جۋىعى سىرتقى قارىز ەسەبىنەن سالىنىپ جاتىر. سەبەبى, بيۋدجەت ەسەبىنەن جول سالۋعا قاراجات قاراستىرىلماعان. ال سىرتقى قارىزداردى قايتارۋدىڭ بىرنەشە جولى بار. ءبىرىنشىسى – كونتسەسسيا ارقىلى, ياعني اقىلى جولداردان تۇسكەن قاراجات ەسەبىنەن وتەۋ. ەكىنشىسى – بيۋدجەتتەن جەڭىلدەتىلگەن نەسيە بەرۋ ارقىلى قايتارۋ. ءۇشىنشىسى – رەسپۋبليكالىق بيۋدجەت ەسەبىنەن. قارىزدى «قازاۆتوجول» ءوزى تىكەلەي نەمەسە كولىك مينيسترلىگىنە قاراستى اۆتوموبيل جولدارى كوميتەتى ارقىلى قايتارادى. قازىرگى ۋاقىتتا ەلىمىزدە رەسپۋبليكالىق ماڭىزى بار 25 مىڭ شاقىرىم جول بار. سونىڭ بارىنە «قازاۆتوجول» جاۋاپتى. بۇگىندە اتالعان جولداردىڭ 3 100 شاقىرىمىندا قۇرىلىس جۇمىستارى ءجۇرىپ جاتىر. ونىڭ 2 مىڭعا جۋىق شاقىرىمىن بيىل پايدالانۋعا بەرۋىمىز قاجەت», — دەدى دارحان يماناشەۆ.

ونىڭ اتاپ وتۋىنشە, سالىنعان جول پايدالانۋعا بەرىلەر الدىندا 5 ساتىلى, ياعني جولدى كوتەرۋ, قيىرشىق تاس, اسفالتتى بەتون توسەۋ سىندى جۇمىستار اياقتالعاننان كەيىن تەحنيكالىق جانە اۆتورلىق قاداعالاۋ ماماندارى, كومپانيا وكىلدەرى تەكسەرۋدەن وتكىزەدى. مۇنان بولەك, كولىك مينيسترلىگىنە قاراستى «ساپا» ورتالىعى «قازاۆتوجول» قابىلداپ العان جول ۋچاسكەلەرىن قوسىمشا تەكسەرىپ شىعادى. جولعا قاجەتتى ماتەريالداردىڭ مىندەتتى تۇردە سەرتيفيكاتى بولۋى ءتيىس.

سونىمەن قاتار ولار قۇرىلىسقا پايدالانىلار الدىندا زەرتحانالىق تەكسەرۋدەن وتكىزىلەدى.
جول سالاسىنداعى ماسەلەلەر

كومپانيا باسشىسىنىڭ سوزىنە قاراعاندا, ەلىمىزدىڭ جول سالاسىندا بىرنەشە ماسەلە بار. ونىڭ ىشىندە 2017, 2019 جىلدارى باستالعانىمەن ءالى كۇنگە اياقتالماعان بىرنەشە جوبانى ايتۋعا بولادى. بۇل جولداردىڭ قۇرىلىسى ۇزاق ۋاقىتقا سوزىلىپ كەتكەن. بىراق, قۇرىلىس جۇمىستارىنىڭ سوزىلۋىنىڭ وزىندىك سەبەپتەرى بار ەكەندىگى دە راس.

«ماسەلەن, قاراجات ماسەلەسى تۋىندايدى. ونى شەشسەڭ بيتۋم ماسەلەسى الدان شىعادى. وزدەرىڭىز دە بىلەسىزدەر. ەلىمىزدە بيتۋم تاپشى. ماۋسىمدىق كەزەڭدە بيتۋمعا سۇرانىس 2-3 ەسەگە ارتادى. قازاقستاندا بيتۋم شىعاراتىن بىرنەشە زاۋىت بار. ايتالىق, بيىلعا 1 ملن 200 مىڭ توننا قاجەت. ال زاۋىتتار 500 مىڭ توننا عانا شىعارادى. وسى ماسەلەگە وراي زاۋىتتارمەن كەزدەستىك. ولار ءونىم شىعارۋ كولەمىن 1 ملن تونناعا دەيىن ارتتا الاتىندىقتارىن ايتادى. بىراق, ءونىم – ماۋسىمدىق. قىستا وعان قاجەتتىلىك جوق. سوندىقتان زاۋىتتار قىستا مازۋت شىعارادى. سەبەبى, قىستا ەشقانداي ەلدە جول سالىنبايدى. قىستا جازعا دايىندىق جۇرگىزىلەدى. ياعني, قيىرشىق تاس دايىندايدى, تەحنيكالارىن جوندەيدى, جول قۇرىلىسىنا قاجەتتى زاۋىتتاردى ءبىر جەردەن ەكىنشى جەرگە كوشىرەدى. مەردىگەر كومپانيالار وزدەرىنە تيەسىلى ۋچاسكەنىڭ قىستا قارىن تازالايدى. ويتكەنى, ولار جول سالۋ بارىسىندا سول ۋچاسكەگە 100 پايىز جاۋاپتى», — دەدى ول.

جولداردىڭ 70 پايىزىن شەتەلدىكتەر سالىپ جاتىر, وتاندىق كومپانيالار تالاپقا ساي ەمەس

دارحان يماناشەۆتىڭ اتاپ وتۋىنشە, ەلىمىزدە رەسپۋبليكالىق ماڭىزى بار جولداردىڭ 70 پايىزىن شەتەلدىك كومپانيالار سالىپ جاتىر. ونىڭ كوپشىلىگى – قىتايلىق كومپانيالار. وسىعان وراي تاياۋداعى ۇكىمەتتىڭ كەڭەيتىلگەن وتىرىسىندا مەملەكەت باسشىسى جول سالاسىنا وتاندىق كومپانيالاردى كوپتەپ تارتۋ تۋرالى تاپسىرما بەرگەن بولاتىن. الايدا, ەلىمىزدەگى جولداردىڭ باسىم بولىگى سىرتقى قارىز ەسەبىنەن سالىنىپ جاتقاندىقتان شەتەلدىك بانكتەر تاراپىنان جوعارى تالاپتار بار. ال وتاندىق كومپانيالار ول تالاپتارعا سايكەس كەلمەيدى.