جولداۋدا اەس سالۋعا قاتىستى رەفەرەندۋم قاشان وتەتىنى ايتىلدى

فوتو: اشىق دپرەككوز

توقاەۆ ەل اراسىندا تالقىلانىپ جۇرگەن اەس سالۋ جونىندەگى رەفەرەندۋمنىڭ قاشان وتەتەنىن ايتتى. بۇل تۋرالى qandastar.kz اقپارات اگەنتتىگى حابارلايدى.

“اتوم ەلەكتر ستانتسياسىن سالۋ ماسەلەسىنە قاتىستى جالپىۇلتتىق رەفەرەندۋم بيىلعى 6 قازاندا وتەدى. بۇگىن ءتيىستى جارلىققا قول قويامىن. الداعى رەفەرەندۋم كەڭ اۋقىمدى جالپىۇلتتىق ديالوگتىڭ تاعى ءبىر ايقىن كورىنىسى بولماق. شىن مانىندە, بۇل – «حالىق ۇنىنە قۇلاق اساتىن مەملەكەتكە» ءتان سيپات. ءبىز وسىنداي قادامدار ارقىلى جاڭا قوعامدىق-ساياسي مادەنيەتتىڭ نەگىزىن قالايمىز. ماڭىزدى مەملەكەتتىك شەشىمدەر قابىلداۋدىڭ جاڭا ۇلگىسىن جاسايمىز», – دەيدى مەملەكەت باسشىسى.

پرەزيدەنت اتوم ەلەكتر ستانتسياسى تۋرالى رەفەرەندۋم سەكىلدى ماڭىزدى شەشىمدەردىڭ جۇرتشىلىقپەن بىرلەسىپ جاسالۋعا ءتيىس ەكەنىن اتاپ ءوتتى.

“رەفەرەندۋم تاقىرىبىنىڭ قوعام تالقىسىنا تۇسكەنىنە ءبىر جىل بولدى. بۇل ازاماتتارىمىزدىڭ جان-جاقتى ويلانىپ, سالماقتى شەشىم قابىلداۋىنا جەتكىلىكتى مەرزىم دەپ ويلايمىن. سوندىقتان مەن ۇكىمەتتىڭ ۇسىنىسىن قولدايمىن”, – دەدى توقاەۆ.

ەسكە سالايىق, بۇعان دەيىن الماتىدا قازاقستانداعى اەس قۇرىلىسىنا قاتىستى قوعامدىق تالقىلاۋلار ءوتتى. تالقىلاۋ سوڭى قاقتىعىس پەن داۋعا ۇلاستى. اەس سالۋ كەرەك دەگەن توپ قازاقستاندا ەنەرگيا تاپشىلىعى بارعان سايىن ۋشىعا بەرەتىنىن جانە بۇعان بالاما بولا الاتىن تۇراقتى ەنەرگيا كوزى, جەل مەن كۇن ەنەرگياسى وندىرەتىن قۋات تۇراقسىز ەكەنىن ايتتى.