جۇرگىزۋشى كۋالىگىن بەرۋ ءۇشىن ازاماتتاردان اقشا العان حقكو قىزمەتكەرلەرى سوتتالدى

فوتو: istockphoto.com

وسكەمەن قالاسىنىڭ №2 سوتىندا مامانداندىرىلعان حقكو باسشىسى مەن ەكى قىزمەتكەرىنە قاتىستى قىلمىستىق ءىس قارالدى.

«ازاماتتارعا ارنالعان ۇكىمەت» مەملەكەتتىك كورپوراتسياسى فيليالىنىڭ حالىققا قىزمەت كورسەتۋ جونىندەگى مامانداندىرىلعان ءبولىمىنىڭ باسشىسى ءوزىنىڭ ەكى قىزمەتكەرىنىڭ كومەگىمەن وتكەن جىلدىڭ اقپان-قازان ايلارىنىڭ ارالىعىندا ازاماتتاردان جۇرگىزۋشى كۋالىگىن الۋعا ەمتيحان تاپسىرعان كەزدە كومەك كورسەتكەنى ءۇشىن اقشا العان. اقشانىڭ جالپى سوماسى 34 960 500 تەڭگەنى قۇرادى, دەپ حابارلايدى  qandastar.kz  turkystan.kz-كە سىلتەمە جاساپ.

سوتتالۋشىلار جاساعان قىلمىسىن مويىنداپ, ىستەگەن ىستەرىنە وكىنىش ءبىلدىردى. مەملەكەتتىك ايىپتاۋشىمەن كىنانى مويىنداۋ تۋرالى پروتسەسسۋالدىق كەلىسىم جاسادى.

سوت ۇكىمىمەن حالىققا قىزمەت كورسەتۋ ورتالىعىنىڭ باسشىسى كىنالى دەپ تانىلىپ, 1 725 000 تەڭگە ايىپپۇل سالىندى. مەملەكەتتىك جانە كوممەرتسيالىق ەمەس مەكەمەلەردە لاۋازىمدى قىزمەتتەر اتقارۋ قۇقىعىنان ءبىر جىلعا ايىرىلدى. ءبىر قىزمەتكەرىنە دە وسىنداي جازا تاعايىندالعان. ەكىنشىسى مەملەكەتتىك جانە كوممەرتسيالىق ەمەس مەكەمەلەردە لاۋازىمدى قىزمەتتەر اتقارۋ قۇقىعىنان ءۇش جىلعا ايىرىلدى. ونىڭ قىلمىستىق جولمەن تاپقان اقشاعا ساتىپ العان پاتەرى تاركىلەندى.

ۇكىم ءالى زاڭدى كۇشىنە ەنگەن جوق.