«ءجۇرسىننىڭ جۇيرىگى» بولعان اتاقتى ايتىسكەر التى جىلعا سوتتالدى

فوتو: ستوپكادر

اقىن مەملەكەتتىك قىزىمەتتە وتىرعان كەزدە ورىندالماعان جۇمىس ءۇشىن بيۋدجەت قارجىسىن الىپ, يەمدەنگەن.

ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى سوتتالدى, دەپ حابارلايدى Kyn.kz اقپارات اگەنتتىگى.

انتيكور مالىمەتىنشە, جەزقازعان قالالىق سوتى وبلىستىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ءا.س. ومارعا قاتىستى ۇكىم شىعاردى.

ول مۇراجاي ماماندارى مەن باسقا دا عالىمداردىڭ ماقالالار جيناعىن شىعارۋ بويىنشا ورىندالماعان جۇمىستارى ءۇشىن زاڭسىز اۋدارۋ ارقىلى 2,3 ملن تەڭگە سوماسىندا بيۋدجەت قاراجاتىن جىمقىرعانى ءۇشىن كىنالى دەپ تانىلدى.

ومار بۇرىن جەزقازعان قالالىق سوتىنىڭ 2024 جىلعى 12 ناۋرىزداعى ۇكىمىمەن پارا العانى ءۇشىن 6 جىلعا باس بوستاندىعىنان ايىرىلعاندىقتان, قازاقستان رەسپۋبليكاسىنىڭ قىلمىستىق كودەكسىنىڭ 58-بابىنىڭ 3,6 بولىكتەرىنە سايكەس, قىلمىستىق قۇقىق بۇزۋشىلىقتاردىڭ جيىنتىعى بويىنشا تاعايىندالعان جازانىڭ وتەلمەگەن بولىگىن ءىشىنارا قوسۋ ارقىلى ءا.ومارعا مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرا وتىرىپ, 6 جىل 6 اي مەرزىمگە باس بوستاندىعىنان ايىرۋ تۇپكىلىكتى جازاسى تاعايىندالدى, – دەلىنگەن مالىمەتتە.

ءانۋار وماروۆ كەزىندە ايتىسكەر رەتىندە كوپشىلىككە كەڭىنەن تانىلعان. ول كەيىنگى جىلدارى مەملەكەتتىك قىزمەتكە اۋىسىپ, ۇلىتاۋ اۋدانىنىڭ اكىمى بولىپ ەكى رەت تاعايىندالعان. كەيىن ساتباەۆ قالاسىنىڭ اكىمى بولىپ, ۇلىتاۋ وبلىسى جاڭادان قۇرىلعان سوڭ باسقارما باسشىسى لاۋازىمىنا قىزمەتكە كىرىستى.