استانادا قادىر تۇنىندە مەشىتكە جينالعان جۇرت تەگىن تاماققا تالاستى

فوتو: اشىۇ دەرەككوز

الەۋمەتتىك جەلىدە قادىر ءتۇنى استاناداعى ازىرەت سۇلتان مەشىتىنىڭ الدىندا جينالعان جاماعاتتىڭ تەگىن تاماققا تالاسقان ۆيدەوسى تارادى. تەگىن تاماق ءۇشىن قاۋمالاپ, جانتالاسقان جۇرت جەلى قولدانۋشىلاردىڭ اشۋىن تۋعىزدى. بۇل تۋرالى qandastar.kz حابارلادى.

ەلورادالىق مەيمانحانا قادىر ءتۇنىن كۇتكەن استانالىقتارعا ازىرەت سۇلتان مەشىنىڭ الدىندا تەگىن تاماق تاراتقان. تەگىن تاماقتان دامەتكەندەردىڭ قاراسى كوبەيىپ, مەشىتتىڭ الدىندا بەيبەرەكەتسىزدىك ورنادى. الەۋمەتتتىك جەلىدە تاراعان ۆيدەودان جاس بالالار مەن ەرەسەكتەردىڭ تاماق تيەلگەن كولىككە قاراي جۇگىرىپ بارا جاتقانىن كورۋگە بولادى. تاماققا تالاسقان ادامدار جەلى قولدانۋشىلارىنىڭ نارازىلىعىن تۋعىزدى.

«دىم كورمەگەندەر», «بىزدە ءبارى باياعىداي», «وسىنداي جاعداي بولماس ءۇشىن مۇنداي شارالار ۇيىمداستىرماۋ كەرەك», «اشتان كەلگەندەي, ۇيلەرىڭدە تاماق جوق پا? جابايىلارعا ۇقساپ تاپ بەرگەنى نەسى?», «حالىق اش», «بىزدە تەگىن ەشتەڭە تاراتۋعا بولمايدى. ادامدار جانۋاردان بەتەر بولىپ كەتەدى», «مىناۋ ۇيات قوي», «مەشىتكە نە ءۇشىن كەلگەندەرىن ۇمىتىپ قالدى عوي دەيمىن», – دەپ جارىسا جازدى جەلىدەگىلەر.

stan.kz  جازعانداي, مەشىتكە جينالعان ادامدارعا تەگىن تاماق تاراتقان «Miko» دەگەن مەيمانحانا بولىپ شىقتى. مەيمانحانا باسشىسىنىڭ ايتۋىنشا, جىل سايىن قادىر تۇنىندە ادامدارعا تەگىن تاماق تاراتادى. الايدا مۇنداي قاۋمالاعان ادامدى ءبىرىنشى رەت كورگەن.

«ءوز قىزمەتكەرلەرىمىزگە مەشىت ماڭىندا تەگىن تاماق تاراتانىمىز تۋرالى ايتتىق. بىراق مۇنداي حابارلامانى جەلىدە جاريالاعان جوقپىز. ءبىز مۇنى جىلدا ىستەپ ءجۇرمىز. بىراق مۇنداي جاعداي بولماعان. جەلىگە سالعان ادام جينالعانداردىڭ تالاسىپ جاتقانىن, گازەلدىڭ كەلىپ توقتاعان ءساتىن تۇسىرگەن. بىراق ودان كەيىن ادامدار كەزەككە تۇردى. ءبىز كەزەكپەن تاراتىپ بەردىك. ونى تۇسىرمەگەن. جالپى مىڭ ادامعا شاقتاپ دايىنداعان ەدىك. الايدا جينالعانداردىڭ سانى ودان كوپ بولىپ كەتتى», – دەيدى باسشىلىق.

بولعان جاعدايعا قاتىستى استانالىق پوليتسيا دا پىكىر ءبىلدىردى. ۆەدومستۆونىڭ مالىمەتىنشە, تاماق تاراتقاندار اتقارۋشى ورگاننىڭ رۇقساتىن الماعان.

«قادىر ءتۇنى» كەزىندە ازىرەت سۇلتان مەشىتىنىڭ اۋماعىندا مەشىت قىزمەتكەرلەرىنىڭ كەلىسىمىمەن, بىراق جەرگىلىكتى اتقارۋشى ورگاننىڭ رۇقساتىنسىز, ورازا كەزىندەگى سارەسى ۋاقىتىندا تاماق تاراتىلعان. بۇل جاعداي ادامداردىڭ جاپپاي جينالۋىنا سەبەپ بولدى. پوليتسيا قىزمەتكەرلەرى وقيعا ورنىنا بارىپ, جاعدايدى رەتتەدى», – دەپ مالىمدەدى پوليتسيا.

سونداي-اق پوليتسيا قىزمەتكەرلەرى مەشىت باسشىلىعىنا قوعامدىق ءتارتىپ بۇزۋشىلىقتارعا جول بەرمەۋ تۋرالى پروفيلاكتيكالىق اڭگىمە جۇرگىزدى.