ەلورداعا اسكەري پارادقا قاتىسۋشىلاردىڭ العاشقى لەگى كەلدى

فوتو:gov.kz

قورعانىس مينيسترلىگىنىڭ اقپاراتىنا سايكەس, قۇرلىق اسكەرلەرى «باتىس» وڭىرلىك قولباسشىلىعىنا قاراستى تەڭىز جاياۋ اسكەرى بريگاداسىنىڭ ىرىكتەۋدەن وتكەن 170-تەن استام اسكەري قىزمەتشىسى ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري پارادقا قاتىسادى,  دەپ حابارلايدى qandastar.kz

ەلورداداعى قازاق ەلى الاڭىندا وتەتىن شەرۋدە اقتاۋ گارنيزونىندا قىزمەت وتكەرىپ جاتقان وفيتسەرلەر, سەرجانتتار جانە مەرزىمدى قىزمەتتىڭ 160 ساربازى سالتاناتتى ساپ تۇزەمەك.

– پارادقا قاتىسۋشىلار بار جاعىنان مۇقيات ىرىكتەۋدەن ءوتتى. بۇل ءبىز ءۇشىن ۇلكەن مارتەبە جانە جاۋاپكەرشىلىك. ويتكەنى, اسكەري شەرۋ – بەيبىتشىلىك ءۇشىن ءوز جانىن قۇربان ەتكەن باتىرلارعا دەگەن قۇرمەت, – دەپ اتاپ ءوتتى تەڭىز جاياۋ اسكەرى بريگاداسى كومانديرىنىڭ جاۋىنگەرلىك جانە دەنە شىنىقتىرۋ دايارلىعى جونىندەگى ورىنباسارى مايور بەرىك المانيازوۆ.

سالتاناتتى قارسى الۋدان كەيىن تەڭىز جاياۋ اسكەرى ۋاقىتشا ورنالاساتىن جەرگە جەتكىزىلدى.

ايتا كەتۋ كەرەك, جەڭىس شەرۋىنە دايىندىق بارىنشا ۇيىمشىلدىقتى, ءتارتىپتى جانە جوعارى جاۋاپكەرشىلىكتى قاجەت ەتەدى. بيىل وعان قارۋلى كۇشتەر, باسقا دا اسكەرلەر مەن اسكەري قۇرالىمداردىڭ 4000-نان اسا اسكەري قىزمەتشىسى قاتىسادى. ونىڭ ىشىندە 200-دەن استام اسكەري قىزمەتشى ايەل بار. پارادقا 200-دەن اسا اسكەري تەحنيكا مەن اۆياتسيا قاتىسادى.