نازارباەۆتاردىڭ ارالىنا ەندى كىم يەلىك ەتپەك?

فوتو: اشىق دەرەككوز

استاناداعى نۇرسۇلتان نازارباەۆ ارالىنىڭ جاڭا يەسى كىم? بۇل تۋرالى Orda.kz ماتەريالىندا ايتىلدى, — دەپ حابارلايدى qandastar.kz

«جاسىل» ارالى ەسىل اۋدانىنىڭ ەسىل وزەنى بويىندا ورنالاسقان. كەيىنگى 20 جىل بويى ول نۇرسۇلتان جانە بولات نازارباەۆتاردىڭ مەنشىگىندە بولدى.

«2022 جىلعى قاڭتار وقيعاسىنان كەيىن نۇرسۇلتان نازارباەۆ ءوز ۇلەسىن ۇلى تاۋمانعا, ال بولات نازارباەۆ ۇلەسىن ۇلى نۇربول مەن قىزى قۇندىزعا سىيعا تارتقان. ەندى بۇل جەرلەردىڭ يەسى وزگەردى», — دەپ جازىلعان مالىمەتتە.

2007 جىلى اكىمدىك بۇل جەر تەلىمىن نازارباەۆقا سىيعا تارتقان. 2009 جىلى ارالدىڭ ءبىر بولىگى ءىنىسى بولات نازارباەۆقا ءوتتى. 2010 جىلداردىڭ باسىنان بەرى ارال تاۋلىك بويى پوليتسيا كۇزەتىندە.

جان-جاعى ۇلكەن قورشاۋمەن قورشالعان اۋماقتا جەكە ۇيلەر, تىكۇشاق الاڭى جانە جاساندى ورمان بار.

«ارال ءالى كۇنگە دەيىن قاتاڭ كۇزەتتە, بىراق ەكس-پرەزيدەنت وتباسى مۇشەلەرىنىڭ وندا تۇرىپ جاتقانى تۋرالى اقپارات جوق.ارالدىڭ نازارباەۆتار يەمدەنبەگەن بولىگىن قر پرەزيدەنتى ىستەر باسقارماسى يەلەنگەن», — دەپ جازىلعان مالىمەتتە.

دەگەنمەن جاقىندا ارالدىڭ ءبىر بولىگى جاڭا مەنشىك يەسىنە ءوتتى. قوعامدىق كاداستر كارتاسىنا سايكەس, قۇندىز جانە نۇربول نازارباەۆتاردىڭ ۇلەستەرى ەندى «Smart Investment» جشس-نا تيەسىلى.

بۇل كومپانيانى «بايتاۋ دامۋ قورى» قۇرعان, ول نۇرسۇلتان نازارباەۆتىڭ قور قۇرىلىمىنا كىرەدى. كومپانيا استاناداعى ءبىرىنشى پرەزيدەنت كىتاپحاناسىندا ورنالاسقان.

«وسىلايشا, جەر تەلىمى قايتادان نۇرسۇلتان نازارباەۆتىڭ ىقپالىندا قالعان. كاداسترلىق كارتا بويىنشا ۋچاسكەنىڭ قالعان بولىگى جەكە تۇلعاعا تيەسىلى. ونىڭ كىم ەكەنى بەلگىسىز, بىراق بۇل تۇلعا تاۋمان نازارباەۆ بولۋى مۇمكىن», — دەپ جازدى باسىلىم.