Nazarbaevtardyń aralyna endi kim ıelik etpek?

Foto: ashyq derekkóz

Astanadaǵy Nursultan Nazarbaev aralynyń jańa ıesi kim? Bul týraly Orda.kz materıalynda aıtyldy, — dep habarlaıdy qandastar.kz

«Jasyl» araly Esil aýdanynyń Esil ózeni boıynda ornalasqan. Keıingi 20 jyl boıy ol Nursultan jáne Bolat Nazarbaevtardyń menshiginde boldy.

«2022 jylǵy Qańtar oqıǵasynan keıin Nursultan Nazarbaev óz úlesin uly Taýmanǵa, al Bolat Nazarbaev úlesin uly Nurbol men qyzy Qundyzǵa syıǵa tartqan. Endi bul jerlerdiń ıesi ózgerdi», — dep jazylǵan málimette.

2007 jyly ákimdik bul jer telimin Nazarbaevqa syıǵa tartqan. 2009 jyly araldyń bir bóligi inisi Bolat Nazarbaevqa ótti. 2010 jyldardyń basynan beri aral táýlik boıy polıııa kúzetinde.

Jan-jaǵy úlken qorshaýmen qorshalǵan aýmaqta jeke úıler, tikushaq alańy jáne jasandy orman bar.

«Aral áli kúnge deıin qatań kúzette, biraq eks-prezıdent otbasy músheleriniń onda turyp jatqany týraly aqparat joq.Araldyń Nazarbaevtar ıemdenbegen bóligin QR prezıdenti ister basqarmasy ıelengen», — dep jazylǵan málimette.

Degenmen jaqynda araldyń bir bóligi jańa menshik ıesine ótti. Qoǵamdyq kadastr kartasyna sáıkes, Qundyz jáne Nurbol Nazarbaevtardyń úlesteri endi «Smart Investment» JShS-na tıesili.

Bul kompanııany «Baıtaý damý qory» qurǵan, ol Nursultan Nazarbaevtyń qor qurylymyna kiredi. Kompanııa Astanadaǵy Birinshi Prezıdent kitaphanasynda ornalasqan.

«Osylaısha, jer telimi qaıtadan Nursultan Nazarbaevtyń yqpalynda qalǵan. Kadastrlyq karta boıynsha ýchaskeniń qalǵan bóligi jeke tulǵaǵa tıesili. Onyń kim ekeni belgisiz, biraq bul tulǵa Taýman Nazarbaev bolýy múmkin», — dep jazdy basylym.