شىمكەنت اكىمدىگى 61 ملن تەڭگەگە ايتىس وتكىزبەك: عابيت سىزدىقبەكوۆ بيۋدجەت قارجىسىن ءتيىمدى پايدالانا ما?

شىمكەنت قالاسىنىڭ اكىمدىگى قالانىڭ تۋعان كۇنىنە وراي ۇلكەن مادەني ءىس-شارا – رەسپۋبليكالىق دەڭگەيدەگى اقىندار ايتىسىن ۇيىمداستىرماق. بۇل – ءبىر قاراعاندا قۋانارلىق جاڭالىق. الايدا مەملەكەتتىك ساتىپ الۋ پورتالىنا جاريالانعان تەحنيكالىق سيپاتتاما مەن وعان بولىنەتىن 61 280 360 تەڭگە قاراجاتتى كورگەن سوڭ, قوعامدىق قىزىعۋشىلىقپەن قاتار, كۇمان تۋدىراتىن سۇراقتار دا پايدا بولارى انىق, دەپ جازادى qandastar.kz

شىنىندا دا, بۇل ءىس-شاراعا بولىنگەن قاراجات قانشالىقتى ءتيىمدى جۇمسالماق? نەگە شىمكەنت اكىمى عابيت سىزدىقبەكوۆ بيۋدجەت قارجىسىن وتە ءتيىمسىز پايدالانادى? مانە, وسىنى سارالاپ كورەيىك.

ءىس-شارانىڭ اۋقىمى مەن قۇرىلىمى

تەحنيكالىق سيپاتتاماعا سايكەس, ۇيىمداستىرۋشى تاراپتان كەلەسى ەلەمەنتتەر تالاپ ەتىلەدى:

• ءىس-شارا باعدارلاماسى مەن ستسەناريىن جاساۋ;
• شاقىرىلاتىن اقىنداردىڭ كونتينگەنتىن قالىپتاستىرۋ;
• بەينەروليكتەر (كەمىندە 5);
• LED-ەكرانمەن, دىبىس پەن جارىق جۇيەسىمەن جابدىقتالعان ساحنا;
• قاتىسۋشىلارعا ارنالعان كولىك, قوناق ءۇي, تاماق, ۇلتتىق شاپان تۇرىندەگى سىيلىقتار;
• قازىلار القاسىن جاساقتاۋ;
• پرەسس-رەليز, مەديا-جوسپار, الەۋمەتتىك جەلىدە 100 مىڭنان كەم ەمەس وقىرمانى بار پاراقشالار ارقىلى PR-كامپانيا;
• جۇلدە قورى: 2 ملن تەڭگەدەن باستالىپ, 200 مىڭ تەڭگەگە دەيىن بەرىلەتىن 17 جۇلدە.
• بۇدان بولەك كەمىندە 100-دەن استام روزا گ ۇلى جانە تاعى باسقا دۇنيەلەر دە بار…

وسىلايشا, ءىس-شارا ءبىر كۇندىك فورماتتا عانا ەمەس, بىرنەشە كۇنگە سوزىلاتىن, كەڭ كولەمدەگى مەديالىق, تەحنيكالىق جانە شىعارماشىلىق جۇمىستى تالاپ ەتەدى.

اقىندار ايتىسى – ۇلتتىق برەند پە, الدە ۋاقىتشا جوبا ما?

ايتىس – قازاقتىڭ ءتول ونەرى, ونى قولداۋ كەرەك دەيمىز. بىراق قازىر حالىقتىڭ تۇرمىستىق ءال-اۋقاتى ايتىس تىڭداپ, توي تويلاپ جۇرەتىندەي مە? نەگە سول بولىنەتىن قارجىنى باسقا يگى ماقساتقا جۇمساماسقا? ماسەلەن, شىن مۇقتاج جاندار مەن مۇگەدەكتەرگە ءبولىنىپ بەرىلسە… ال ونى تۇسىنەتىن اكىمدىك قايدا?..

تەحنيكالىق سيپاتاماسى جازىلعان ايتىستىڭ مازمۇنى مەن فورماتى تولىقتاي اشىلماعان. شاقىرىلاتىن اقىنداردىڭ اتى-ءجونى, ايتىستىڭ تاقىرىپتىق باعىتتارى, تىكەلەي ەفير ارقىلى تاراتىلا ما, ەل اراسىنا قانداي جاڭالىق نە وي تاستايدى – بۇل ساۋالداردىڭ جاۋابى ءجوندى كورسەتىلمەگەن.

كۇمان تۋعىزاتىن تاعى ءبىر جايت بار. بۇل ءىس-شارانى وتكىزۋ ءۇشىن قازىلارعا تولەنەتىن گونورار, ولاردى الىپ كەلۋ, ورنالاستىرۋ, ارنايى برەندتەلگەن شاپان دايىنداۋ جانە قاتىسۋشىلاردىڭ دا جولاقىسى, سىيلىقتارى سەكىلدى شىعىنداردىڭ ءبارى قامتىلعان. جانە قازىلار القاسى كەمى بەس جۇلدىزدا قوناق ۇيدە جاتۋى كەرەك ەكەن.

پروپاگاندا ما?

تەحنيكالىق سيپاتتامادا اقپاراتتىق ناسيحاتقا باسا ءمان بەرىلگەن:

• ءىس-شاراعا ارنالعان 30 سەكۋندتىق روليكتى 10 كۇن بويى كەمىندە 3 رەت جەرگىلىكتى ارنادان كورسەتۋ;
• الەۋمەتتىك جەلىلەردە 100 مىڭنان استام وقىرمانى بار پاراقشالاردا 5 رەتتەن كەم ەمەس جاريالانىم;
• مەديا-جوسپار دايىنداۋ جانە كەلىسۋ.

وسى جەردە مىنا ءبىر ۇراق تۋىندايدى: شىمكەنتتەگى ءبىر رەتتىك ايتىس ءۇشىن وسىنشا كولەمدەگى جارناما قانشالىقتى قاجەت? بۇل – ۇلتتىق مادەنيەت ءۇشىن ەمەس, اكىمدىكتىڭ ءوزىن-ءوزى جارنامالاۋعا ۇمتىلىسىسياقتى كورىنبەي مە?

بيۋدجەت اشىق پا?

مەملەكەتتىك ساتىپ الۋ پورتالىندا جاريالانعان سوما – 61,2 ملن تەڭگە. بىراق ونىڭ ناقتى نەگە, قالاي بولىنەتىنى تۋرالى اشىق تالداۋلار جوق. سوندىقتان دا شىمكەنت اكىمدىگى بۇعان دەيىن جازعان ماقالامىزدى ەسكەرمەگەنى كورىنىپ تۇر. مىسالى:

• 5 بەينەروليكتىڭ قۇنى قانشا?
• 1000 ادامدىق كونتسەرت زالى جالداۋدىڭ ناقتى باعاسى قانشا?
• قازىلار القاسىنىڭ ءار مۇشەسىنە قانشا تولەنەدى?
• ءبىر اقىنعا شاقىرۋ مەن قوناق ءۇي شىعىنى قانشا?

بۇل قاراجاتتىڭ اشىقتىعى مەن تيىمدىلىگى تۋرالى ناقتى ەسەپ بەرىلمەسە, ارينە, ادامداردىڭ نارازىلىق تۋدىرۋى – زاڭدى.

سىن مەن ۇسىنىس

ەگەر اكىمدىك راسىمەن ۇلتتىق ونەرگە قولداۋ كورسەتۋدى ماقسات ەتسە:

• ايتىسقا اشىق ىرىكتەۋ جاريالانۋعا ءتيىس;
• قاتىسۋشىلاردىڭ ءتىزىمى مەن جۇلدە شارتتارى جاريا بولۋى كەرەك;
• ءىس-شارا تەك ءبىر كۇندىك PR ناۋقان ەمەس, جىل سايىن وتەتىن ءداستۇرلى دوداعا اينالۋى ءتيىس;
• قوعام وكىلدەرى, مادەنيەت مايتالماندارى ۇيىمداستىرۋ جۇمىسىنا تارتىلۋى كەرەك;
• ەڭ باستىسى – بيۋدجەت اشىق ءارى ەگجەي-تەگجەيلى ەسەپتەلۋى قاجەت.

شىمكەنت اكىمدىگىنىڭ رەسپۋبليكالىق ايتىس وتكىزۋگە بولگەن قارجىسى – ءبىر جاعىنان مادەنيەتتى قولداۋ, ەكىنشى جاعىنان كۇماندى شىعىنداردىڭ كورىنىسى بولۋى مۇمكىن. ەگەر بۇل قاراجاتتىڭ ءار تيىنى ادىلەتتى, اشىق جانە ءتيىمدى جۇمسالسا, بۇل قۋانتارلىق باستاما بولار ەدى. بىراق قازىرگىدەي جاعدايدا قوعامعا ەسەپ بەرۋ, تالقىلاۋعا شىعارۋ جانە قاتىسۋشىلاردىڭ بارلىعىن اشىق جاريالاۋ – باستى تالاپ بولىپ وتىر.