جاڭالىقتار
«تۇنىمەن ۇيىقتاتپايمىن»: قازاقستاندىق قىز پويىزدا جولسەرىكتىڭ تيىسپەك بولعانىن ايتتى
فوتو: Threads Hizoka
قازاقستاندىق قىز قىزىلوردا-پەتروپاۆل 076حا پويىزىندا جولسەرىكتىڭ تيىسپەك بولعانىن ايتتى, دەپ جازدى qandastar.kz. بۇل تۋرالى Stan.kz اقپارات اگەنتتىگى حابارلايدى.
قازاقستاندىق بۇل جاعدايدى Threads الەۋمەتتىك جەلىسىندە جاريالادى.
«جولعا جالعىز شىقتىم. جانىبەك ەسىمدى جولسەرىك ءوزىن وعاش ۇستاپ, تيىسە باستادى. ىشتە كىلەڭ ەر ادامدار وتىردى. جولسەرىك كەلىپ, قولىن بەتىمە سوزىپ, جانىما وتىرىپ: “قاتتى ۇيىقتادىڭ عوي” دەپ ايتتى. سوسىن «تازا اۋا جۇتايىق» دەپ تامبۋرعا شاقىردى. مەن قاتتى قورىقتىم. اينالامداعى ادامداردىڭ ەشبىرى كومەكتەسپەدى. جاي عانا قاراپ وتىردى», – دەيدى قىز.
سوسىن جولاۋشى قىز باسقا جولسەرىكتەن كومەك سۇراپتى. ول قىزدى اجەلەر وتىرعان ۆاگونعا اۋىستىرعان.
«بىراق سول جولسەرىك تاعى كەلدى. ماعان قاراپ ك ۇلىپ: جاقسى كەلە جاتىرسىڭ با? سەنى ىزدەپ, تاپپاي جۇرسەم, وسىندا ەكەنسىڭ عوي. سەنىڭ ورنىڭدا وزبەكتەر وتىر» دەپ ايتتى. سوسىن جاقىنداپ كەلىپ, ەڭكەيىپ: «ۇيىقتاپ ال, تۇنىمەن ۇيىقتاتپايمىن» دەدى. كەيىن ءبىر ۆاگوننان ەكىنشىسىنە ءوتىپ بارا جاتسام قولىمنان ۇستاماق بولدى. ارەڭ قۇتىلدىم. باسقا جولاۋشىلارعا, قورقىپ تۇرمىن, كومەكتەسىڭىزدەرشى دەپ ەدىم, ەشكىم ۇندەمەدى», – دەيدى قىز.
فوتو: Threads Hizoka
وسى جاعدايدان كەيىن جولاۋشى قىز اعا جولسەرىككە شاعىمدانىپتى. الايدا ول دا ەشقانداي شارا قاراستىرماعان.
«سوڭىندا استانالىق دوسىما جازدىم. تانىستارىمنىڭ ارالاسۋى ارقىلى جولسەرىك كەلىپ مەنەن كەشىرىم سۇرادى. ءوزىن قالاي اقتاپ العانىن كورسەڭىز, تاڭعالاسىز. ول “جاي عانا ازىلدەدىم عوي. دۇرىس تۇسىنبەي قالىپسىڭ. ساعان قارىنداسىما قاراعانداي قاراۋعا تىرىستىم» دەپ ايتتى. سوندا بۇل كىسى قارىنداسىنا وسىلاي قاراي ما? بۇل كىسىنىڭ اتى-ءجونى – جانعاراەۆ جانىبەك. ونىڭ ءتۇرىن باسقا قىزدار مۇقيات بولسىن دەپ كورسەتىپ وتىرمىن. ءبىز پويىزدا قاۋىپسىزدىگىڭە ەشكىم كەپىلدىك بەرمەيتىن ەلدە تۇرامىز. ەڭ سوراقىسى, اينالاداعى ادامدار كومەكتەسۋگە قورقادى», – دەپ جازدى جولاۋشى قىز.
فوتو: Threads Hizoka
وسىدان سوڭ باسقا دا جەلى قولدانۋشىلارى ءوز باسىنان وتكەن جاعدايدى باياندادى.
«ستۋدەنت كەزىمدە 1-كۋرس, ءبىرىنشى سەمەستر ءبىتىرىپ, اۋىلعا كەتۋگە بيلەت الا الماي قالعان ەدىم. امال جوق استانادان شىمكەنتكە اۆتوبۋسپەن بارۋعا تۋرا كەلدى. شانحاي بازاردان بيلەت الىپ, اۆتوبۋسقا مىنگەن سوڭ, ءىشى تولى ەر ادامدار ەكەنىن كوردىم. وتە قورقىنىشتى بولدى. بىراق استانادا قالاتىن جەرىم بولماعان سوڭ وتىرۋعا ءماجبۇر بولدىم. سول ساتتە ءبىر تاتە ءمىنىپ, جانىما وتىرىپ, جولدا توقتاعان كەزدە قاسىنان قالدىرماي ەرتىپ ءجۇردى».
«بالالارىم سەمەي-قىزىلوردا پويىزىندا كەلە جاتقاندا, جولسەرىك كۋپەگە بيلەتى جوق ماس جىگىتتەردى وتىرعىزعان. بالالار ماعان تەلەفون سوعىپ, جولسەرىكپەن سويلەسۋدى ءوتىندى. الايدا ول ۆاگونعا كىمدى وتىرعىزاتىنىمدى ءوزىم شەشەمىن دەدى. مەن كولىك مينيسترلىگىندەگى دوسىما حابارلاسىپ, پوليتسيا قىزمەتكەرلەرى 5 مينۋتتا ماسەلەنى شەشىپ بەردى. جولسەرىككە نە بولعانىن بىلمەيمىن. بىراق ونىڭ جۇمىستان شىققانىن قالايمىن».
«ستۋدەنت كەزىمدە ۆاگوندا ەر ادام ماعان تيىسپەك بولعان. جولسەرىك كومەكتەسۋگە تىرىسپادى. سودان بەرى پويىزدا جالعىز جۇرمەيمىن. مۇمكىندىگىنشە از سويلەسۋگە جانە ەشكىممەن بوستان-بوس سويلەسپەۋگە تىرىسامىن. ولار كەز كەلگەن دوستىق قارىم-قاتىناستى فليرت دەپ قابىلداۋى مۇمكىن».
اتالعان جاعدايعا قاتىستى Stan.kz تىلشىسى كولىكتەگى پوليتسيا دەپارتامەنتىنەن ءمان-جايدى سۇراپ ءبىلدى.
ولار تەرگەۋ ءجۇرىپ جاتقانىن حابارلادى.
«مۇنداي جاعدايدا تەمىرجول جانە سۋ كولىگى كوميتەتى ۋاكىلەتتى ورگانعا زاڭدى شارا قولدانۋ ءۇشىن رەسمي حات جولدايدى. ءتيىستى ۆەدومستۆو جولاۋشىلارعا قاتىستى كەز كەلگەن زاڭسىز ارەكەتتەرگە جول بەرۋگە بولمايتىنىن اتاپ كورسەتەدى. جولاۋشىنىڭ قاۋىپسىزدىگى مەن جايلىلىعى ءبىرىنشى ورىندا. جەكە تاسىمالداۋشى اتالعان وقيعاعا قاتىستى قىزمەتتىك تەكسەرىستى باستادى. تەكسەرۋ ناتيجەسى بويىنشا ءتيىستى شارالار قابىلدانادى», – دەلىنگەن حابارلامادا.
سونداي-اق دەپارتامەنت وقيعا بويىنشا ماتەريالدار پروتسەسسۋالدىق شەشىم قابىلداۋ ءۇشىن جەلىلىك پوليتسيا بولىمىنە جولداناتىنىن مالىمدەدى.
ال “جولاۋشىلار تاسىمالى” اق رەيستى جەكە تاسىمالداۋشى ورىنداعانىن حابارلادى.
«بۇل پويىز «ارلانترانساستانا» جەكە تاسىمالداۋشىسىنا تيەسىلى. ونىڭ «جولاۋشىلار تاسىمالى» اق-عا, قازاقستان تەمiر جولىنا قاتىسى جوق. جەكە تاسىمالداۋشىلاردىڭ قىزمەتىن كولىك مينيسترلىگى رەتتەيدى”, – دەلىنگەن حابارلامادا.
