«15 جاستا تۇڭعىشىما اياعىم اۋىر ەدى»: قازاقستاندىق قىز 18 جاسىندا ءۇش بالانىڭ اناسى اتانعان

فوتو: وتباسىلىق مۇراعاتتان

شىمكەنتتىك 19 جاستاعى زارينا مىرزابەك – ۇش بالانىڭ اناسى. زارينا Stan.kz تىلشىسىنە بەرگەن سۇحباتىندا 15 جاسىندا تۇرمىسقا شىعىپ, كەلىندىك قىزمەتكە ەرتە ارالاسقانىن ايتتى.

زارينا كۇيەۋىن 15 جاسىندا كوللەدجدە وقىپ ءجۇرىپ كەزدەستىرگەن.

“9-سىنىپتان كەيىن كوللەدجگە وقۋعا ءتۇستىم. ال كۇيەۋىم كوللەدجگە 11-سىنىپتان كەيىن ءتۇستى. ءوزى 2003 جىلعى. ەكەۋىمىز ءبىر گرۋپپادا وقىدىق. كەيىن ەكەۋمىز جەرلەس ەكەنىمىزدى بىلگەن سوڭ جاقىن ارالاسا باستادىق. ەكەۋىمىز جارتى جىلداي قىز بەن جىگىت بولىپ كەزدەسىپ جۇردىك. كەيىن اياعىم اۋىر ەكەنىن ءبىلدىم. ول كەزدە 15 جاستا ەدىم. سول جىلى 6 ماۋسىم كۇنى 16-عا تولدىم. ول كەزدە ىشتەگى بالا 7 ايلىق ەدى. مەن 16 جاسقا تولعان سوڭ ەكى جاقتىڭ كەلىسىمىمەن نەكەمىزدى قيدىق”, – دەيدى كەيىپكەر.

الايدا جاستاردىڭ بۇل شەشىمىنە زارينانىڭ اتا-اناسى قارسىلىق بىلدىرگەن.

“ارينە, تىم ەرتە دەگەن وي بولدى, بىراق بالالارىما قاراپ شۇكىر ەتەمىن. كۇيەۋىمنىڭ اتا-اناسى قارسى بولعان جوق. بىراق مەنىڭ اتا-انام شامالى قارسىلىق ءبىلدىردى. دەگەنمەن كوندىردىم. تۇڭعىشىمدى 16 جاسىمدا 2021 جىلى 22 تامىزدا بوساندىم. ەكىنشى بالامدى 2023 جىلى 6 ساۋىردە دۇنيەگە اكەلدىم. ءۇشىنشى بالام بيىل قاڭتاردىڭ 19-ى كۇنى ومىرگە كەلدى. قازىر شۇكىر, ەكى ۇل, ءبىر قىزىم بار”, – دەيدى زارينا.

كەيىپكەرىمىز قازىر جوعارعى وقۋ ورنىندا ينتەرەر ديزاينەرى ماماندىعىندا وقىپ جاتىر. بالا كۇتىمىنە بايلانىستى ءبىر جىلعا اكادەميالىق دەمالىس العان.

“قازىر اتا-ەنەممەن بىرگە تۇرامىن. كەلىندىك ومىرگە ۇيرەنۋ قاتتى قيىن بولدى دەپ ايتپايمىن. كوپ دۇنيەدەن بايحابار بولدىم. بىراق كەلىن بولىپ تۇسكەلى ءبارىن ۇيرەنىپ جاتىرمىن. اتا-ەنەم مەن كۇيەۋىمنىڭ تۋىستارى مەنى جاقسى قابىلدادى. قازىر اتا-ەنەم بالا قاراپ كومەكتەسەدى. العاش كەلىن بولىپ تۇسكەندە جاڭا وتباسىما تەز ءسىڭىسىپ كەتتىم. ارينە, ارا-تۇرا تۇسىنىسپەۋشىلىكتەر بولىپ تۇرادى. مەن ءۇشىن تاماق جاساپ ۇيرەنۋ, قامىر جايۋ وڭاي بولمادى”, – دەيدى كەيىپكەرىمىز.

سونداي-اق كەلىن بولىپ تۇسكەن وتباسىنىڭ ءتارتىبى زارينا ءۇشىن تاڭسىق بولعان.

“مەن ءوز ۇيىمدە اتا-انامنان سۇرانبايتىنمىن. باسقا اۋلەتكە كەلىن بولىپ تۇسكەننەن كەيىن باراتىن جەرگە سۇرانىپ, ايتىپ وتىرۋ كەرەك بولدى. اتا-ەنەم “كەلىن” دەپ ەمەس, “قىزىم” دەپ قابىلداعان سوڭ, ايتارلىقتاي قيىندىقتار بولمادى”, – دەيدى كەلىنشەك.

فوتو: وتباسىلىق مۇراعاتتان

جاستاي انا باقىتىن سەزىنگەن زارينا تۇڭعىشىن دۇنيەگە اكەلگەندە-اق موينىنا قانداي جاۋاپكەرشىلىك العانىن تۇسىنگەن.

“العاش رەت انا اتانعاندا بالامنىڭ ءومىرى مەن قاۋىپسىزدىگىنە جاۋاپتى ەكەنىمدى, ونى قاتارىنان قالدىرماي باعىپ-قاعۋ مەنىڭ موينىمدا ەكەنىن ءتۇسىندىم. تۇن ۇيقىنى ءتورت ەمەس قىرىق ءتورت رەت ءبولدىم. ارينە, وڭاي بولدى دەۋگە كەلمەس. قازىر سول ۇلىم 4 جاسقا كەلەدى. بالا كۇتىمىنە قاتىستى قيىندىقتار بولدى دەپ ايتا المايمىن. ۇيدە اتا-ەنەم قاراسقان سوڭ بولار, ۋاقىت جەتكىزە الماي, ۇلگەرمەي جۇرگەن كەزىم بولماپتى. اتا-ەنەم قانداي جاعداي بولماسىن اقىلىن ايتىپ, كەڭەسىن بەرىپ وتىرادى. بىراق بالا تاربيەسى ەشقاشان وڭاي بولعان ەمەس. ورنىمەن ەركەلەتىپ, اقىلمەن جونگە سالۋ دا دانالىق. باسىنان سيپاساڭ تىم ەركەلەپ كەتەدى, ۇرىسسام وزىمنىڭ جۇرەگىم اۋىرادى”, – دەدى زارينا اعىنان جارىلىپ.