الەم جاڭالىقتارىجاڭالىقتار
26 ەل ۋكرايناعا اسكەر جىبەرۋى مۇمكىن
پاريجدە وتكەن «نيەت بىلدىرۋشىلەر كواليتسياسى» سامميتىندە 26 مەملەكەت سوعىستان كەيىن ۋكرايناعا اسكەري كونتينگەنت ورنالاستىرۋعا دايىن ەكەنىن مالىمدەدى. جيىنعا ۋكراينا پرەزيدەنتى ۆلاديمير زەلەنسكي مەن فرانتسيا پرەزيدەنتى ەممانۋەل ماكرون قاتىستى, دەپ حابارلايدى Qandastar.kz Euronews-كە سىلتەمە جاساپ.
فرانتسيا باسشىسى اسكەرلەر قاقتىعىس ايماقتارىنا ەمەس, الدىن الا انىقتالعان گەوگرافيالىق اۋماقتارعا جىبەرىلەتىنىن اتاپ ءوتتى. ونىڭ سوزىنشە, بۇل قادام «رەسەيگە قارسى سوعىس جۇرگىزۋدى» ماقسات ەتپەيدى, كەرىسىنشە ءبىتىم ورناعاننان كەيىنگى قاۋىپسىزدىكتى قامتاماسىز ەتۋگە باعىتتالعان. كونتينگەنتتىڭ ناقتى سانى كەيىن انىقتالادى.
زەلەنسكي بۇل شەشىمدى «جەڭىس» دەپ باعالاپ, قاۋىپسىزدىك كەپىلدىكتەرىنە ۋكراينا ارمياسىن كۇشەيتۋ, قارۋ-جاراق ءوندىرىسىن ارتتىرۋ جانە ۇزاق مەرزىمدى اسكەري دايىندىقتى ساقتاۋ كىرەتىنىن جەتكىزدى.
ماكرون گەرمانيا مەن يتاليانىڭ كواليتسياعا قوسىلعانىن راستادى. ال ۇلىبريتانيا پرەمەر-ءمينيسترى كير ستارمەر ۋكرايناعا الىس قاشىقتىقتاعى زىمىراندار جەتكىزۋگە قاتىستى باستامالاردى قولدادى.
اقش-تىڭ ءرولى ءالى ناقتىلانباعان. زەلەنسكي ۆاشينگتوننان «ناقتى ۇلەستى» كۇتىپ وتىرعانىن ايتتى. ەكى تاراپتىڭ مالىمەتىنشە, جاقىندا پرەزيدەنت دونالد ترامپپەن تەلەفون ارقىلى سويلەسۋدە ۋكرايناعا اۋە قورعانىسى جۇيەلەرى مەن ماسكەۋگە قارسى جاڭا سانكتسيالار تالقىلانعان.
