Jańalyqtar
Nesıeni keshirý máseleleri boıynsha call-ortalyǵy jumys isteıdi
QR Eńbek jáne halyqty áleýmettik qorǵaý mınıstrliginiń bazasynda jumys isteıtin 111 call-ortalyǵynyń mamandary naqty ýaqyt rejıminde azamattarǵa nesıeni keshirý máseleleri boıynsha keńes beredi.
QR Prezıdentiniń 2019 jylǵy 26 maýsymdaǵy Jarlyǵyna sáıkes bankter men mıkroqarjy uıymdarynda kepilsiz tutynýshylyq qaryzdary bar 5 sanattaǵy azamattar úshin bir rettik akııa tártibinde memleket jalpy kólemi 300 myń teńgege deıin negizgi boryshty jáne ol boıynsha eseptelgen ótemaqyny tóleıdi. 300 myń teńgeden asatyn qaryzy barlar 300 myń teńge kóleminde qaryzynyń bir bóligin óteıdi. Bul rette, olardyń jalpy qaryzy aǵymdaǵy jyldyń 1 maýsymyndaǵy jaǵdaı boıynsha 3 mıllıon teńgeden aspaýy tıis.
Qazaqstan Respýblıkasy Prezıdentiniń Jarlyǵyna sáıkes azamattardyń sanattary kelesi: kópbalaly otbasylar; múgedek balalary bar otbasylar, bala kezinen múgedektigi bar 18 jastan asqan azamattar; jalǵyz asyraýshysynan aırylǵan otbasylar; ataýly áleýmettik kómek alýshylar; jetim balalar.
«Joǵaryda kórsetilgen sanattaǵy azamattardyń tizimin qalyptastyrý ortalyq memlekettik organdardyń aqparattyq júıeleriniń derekteri negizinde júzege asyryldy. Atap aıtqanda, QR Bilim jáne ǵylym mınıstrligi jetim balalardyń, ata-anasynyń qamqorlyǵynsyz qalǵan, kámeletke tolǵanǵa deıin ata-analarynan aıyrylǵan jıyrma toǵyz jasqa tolmaǵan balalardyń, 23 jasqa deıingi stýdentterdiń tizimin usyndy. QR Ádilet mınıstrligi «Azamattyq hal aktileriniń jazbalary» aqparattyq júıesinde erli-zaıyptylar nemese ata-analar boıynsha ózekti azamattyq hal aktileri (neke jáne týý týraly) aktileri boıynsha málimetterdi tekserýdi júzege asyrdy» — delingen mınıstrlik taratqan aqparatta.
Nátıjesinde Jarlyqtyń kúshine sáıkes azamattardyń tizimi (shamamen 2,08 mln adam) jáne olardyń otbasy músheleriniń tizimi (shamamen 465 myń adam) qalyptastyryldy. Bul eki tizim (jalpy alǵanda 2,289 mln adam) biregeılikke tekserildi jáne QR Ulttyq banki men Memlekettik kredıttik bıýroǵa berildi. О́z kezeginde, Qazaqstan Respýblıkasynyń Ulttyq Banki tizimnen: kredıti joq, jalpy qaryzy 3 mln teńgeden asatyn, bereshekteri kollektorlyq uıymdarǵa berilgenderdi tizimnen alyp tastady. Nátıjesinde 630 633 qaryz ben mıkrokredıt boıynsha bereshekti óteıtin 506 941 boryshkerdiń tizimi jasaldy.
«Elektrondyq úkimet portalyndaǵy «Borysh júktemesin azaıtýǵa arnalǵan baǵdarlamaǵa qatysý mártebesin tekserý» elektrondyq qyzmetin qoldana otyryp, qaryzdy óteýge júginetin azamattardyń tizimge engizilgenin tekserýge bolady. Ol úshin EQ qajet. Jarlyq pen QR Ulttyq Bankiniń krıterıılerine sáıkes kelýi tıis azamattardyń tizimde bolmaýynyń basty sebebi tizimde OMO aqparattyq júıelerinde olardyń mártebesi týraly ózekti derekterdiń bolmaýynda. Atap aıtqanda, AHAJ AJ-da neke nemese balalardyń týýy týraly jazbalardyń bolmaýy jıi kezdesedi. Osyǵan baılanysty kredıti bar azamattar otbasy quramynan, ıaǵnı Jarlyqqa sáıkes keletin sanattardan shyǵyp qalady. Bul sebep: asyraýshysynan aıyrylýyna baılanysty tólem alatyn otbasylar; múgedek balalary bar otbasylar; 18 jastan asqan bala jasynan múgedek balalary bar otbasylar; ataýly áleýmettik kómek alýshylar sııaqty basqa sanattar boıynsha da bolýy múmkin» — deıdi mınıstrlik ókilderi.
Sondaı-aq, tizimde bolmaýynyń sebebi kópbalaly otbasynyń memlekettik organdarǵa járdemaqy alý úshin júginbeýine jáne eshqandaı aqparattyq júıede bolmaýyna baılanysty bolýy múmkin.
«Sonymen qatar, BǴM-nyń aqparattyq júıesinde 4 myńnan astam jetim bala, sondaı-aq kámeletke tolǵanǵa deıin ata-analarynan aıyrylǵan 29 jasqa tolmaǵan ata-anasynyń qamqorlyǵynsyz qalǵan balalar boıynsha málimetter joq. Eger tizimde bolmasa, azamattar QR Eńbek jáne halyqty áleýmettik qorǵaý mınıstrliginiń bazasynda jumys isteıtin coll-ortalyqqa 111 telefon nómiri arqyly habarlasa alady, onda olarǵa ári qaraı ne isteý kerektigi týraly keńes beriledi» — deıdi mamandar.
