Kópbalaly otbasylarǵa tabysqa qaramastan memlekettik járdemaqy beriledi

Kópbalaly otbasylardyń quramyndaǵy balalarǵa tabysqa qaramastan memlekettik járdemaqy beriledi. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Birjan Nurymbetov aıtty.
Onyń atap ótýinshe, mınıstrlik ataýly áleýmettik kómekti berýdiń qoldanystaǵy júıesin ózgertetin zań jobasyn ázirledi. Basty baǵyt — eńbekke yntalandyrý, azamattardyń tabystaryn jáne memlekettik qoldaý mólsherin esepke alýǵa qatysty ashyqtyq pen ádilettikti qamtamasyz etý.
«Usynylǵan sharalar keshendi túrde qaralýy qajet. Sondyqtan usynylyp otyrǵan jańa ustanymdar kópbalaly analardy qoldaýdy, jańartylǵan ataýly áleýmettik kómekti, kepildi áleýmettik toptamany qamtıtyn bolady», — dedi ol.
Mınıstr dereginshe, ataýly áleýmettik kómekti alatyn balalardyń 60 paıyzdan astamy kópbalaly otasylardan shyqqan.
«Osyǵan baılanysty AÁK alý úshin kópbalaly otbasylar quramyndaǵy balalarǵa tabysqa qaramastan beriletin memlekettik járdemaqyǵa aýystyrýdy usynamyz. Bul kópbalaly analardyń bedelin moıyndap, olardyń ál-aýqatyn arttyrý joly bolar edi. Kópbalaly otbasylarǵa beriletin jańa memlekettik járdemaqyny otbasy balalarynyń sanyna qaraı 42500 teńgeden 73 myń teńgege deıin saralanǵan AEK-ke eselengen mólsherde belgileý usynylady», — dedi B.Nurymbetov.

Derekkóz:https://www.inform.kz/kz/kopbalaly-otbasylarga-tabyska-karamastan-memlekettik-zhardemaky-beriledi_a3572629