جەمقورلاردى شارتتى تۇردە مەرزىمىنەن بۇرىن بوساتۋعا تىيىم سالىنباق

قازاقستاندا جەمقورلاردىڭ تۇرمەدەن شارتتى تۇردە مەرزىمىنەن بۇرىن بوساپ شىعۋىنا تىيىم سالىنباق. بۇل تۋرالى بۇگىن قر سىبايلاس جەمقورلىققا قارسى ءىس-قيمىل اگەنتتىگىنىڭ القا ماجىلىسىندە ۆەدومستۆو باسشىسى اليك شپەكباەۆ ايتتى, دەپ حابارلايدى قازاقپارات ءتىلشىسى.

«جوعارعى سوتتىڭ سوت كورپۋسىن «تازالاۋ« ماسەلەسىندەگى بەلسەندىلىگىن ەسكەرە وتىرىپ ءبىز بىرلەسكەن كۇش-جىگەرىمىزبەن فەميدا قىزمەتكەرلەرىن اشكەرەلەيمىز. وسى جىلدىڭ وزىندە بەسەۋى سوتتالدى. وسىعان وراي, اگەنتتىك قۇقىق قورعاۋ ورگاندارى قىزمەتكەرلەرى مەن سۋديالاردىڭ جەمقورلىق ءۇشىن جاۋاپكەرشىلىگىن كۇشەيتۋگە باستاماشىلىق جاسادى. سونىمەن قاتار, اۋىر جانە اسا اۋىر جەمقورلىق قىلمىستار بويىنشا شارتتى تۇردە مەرزىمىنەن بۇرىن بوساتۋدى قولدانۋعا شەكتەۋ ۇسىنىلدى», — دەدى اگەنتتىك توراعاسى.

ا.شپەكباەۆتىڭ ايتۋىنشا, سوڭعى ءۇش جىلدا كەشەندى الدىن-الۋ شارالارىنىڭ ناتيجەسىندە سىبايلاس جەمقورلىق قۇقىق بۇزۋشىلىقتاردىڭ سانى 14 پايىزعا ازايعان. قىلمىستىڭ نەگىزگى بولىگى – پاراقورلىق (850), ۇرلىق (714) جانە بيلىكتى اسىرا پايدالانۋ (224) فاكتىلەرى. جىل باسىنان بەرى 1028 تۇلعا اشكەرلەندى, ونىڭ 23-ءى رەسپۋبليكالىق جانە 86-ى وبلىستىق دەڭگەيدەگى باسشىلار. «كەلتىرىلگەن زالالدىڭ مولشەرى ەداۋىر ارتتى – 23,2 ملرد تەڭگە. بۇل وتكەن جىلمەن سالىستىرعاندا 1,7 ەسەگە كوپ. ونىڭ 94 پايىزى وتەلدى», — دەدى ا.شپەكباەۆ.