جاڭالىقتار
جول ەرەجەلەرىن ساقتاڭىزدار – ءىىم
جەدەل مالىمەتتەر بويىنشا وتكەن اپتادا 210 جول-كولىك وقيعاسى تىركەلدى. جول-كولىك وقيعالارىنىڭ سالدارىنان 39 ادام قازا تاۋىپ, 289 ادام جاراقات الدى, دەپ حابارلادى ءىىم ءباسپاسوز قىزمەتى.
اپاتتاردىڭ نەگىزگى سەبەبى جول قوزعالىسىنا قاتىسۋشىلاردىڭ جول ءتارتىبىن ساقتاماۋى بولىپ تابىلادى. كوبىنەسە جىلدامدىقتىڭ ارتۋى, تىيىم سالاتىن جانە ەسكەرتەتىن بەلگىلەرگە نازار اۋدارماۋ جانە ولاردى ەلەمەۋ قايعىلى وقيعالارعا اكەپ سوعۋدا.
اۋا-رايىنىڭ ناشارلاۋىنا بايلانىستى ءىىم جول قوزعالىسىنا قاتىسۋشىلارعا قاراپايىم, بىراق وتە ماڭىزدى ەرەجەلەر تۋرالى ەسكەرتەدى, ولاردى ساقتاۋ كۇتپەگەن جەردەن ورىن الاتىن جول-كولىك وقيعالارىنىڭ الدىن الۋعا مۇمكىندىك بەرەدى.
قىستىڭ باستالۋىنا بايلانىستى, قىسقى نەمەسە تىكەنەكتى شينالار ورناتۋ, اۆتوموبيلدى جىلىتۋ جانە اينەكتەرگە جىلۋ ۇرلەۋ جۇيەسىن تەكسەرۋ, سۋىتۋ جۇيەسىندەگى سۇيىقتىقتىڭ مينۋس تەمپەراتۋراسى كەزىندە پايدالانۋعا جارامدىلىعى مەن جاي-كۇيىن تەكسەرۋ, وتىن اپپاراتۋراسىنىڭ سىنۋىن بولدىرماۋ ءۇشىن ديزەل قوزعالتقىشتارى بار كولىك قۇرالدارى ءۇشىن قىسقى ديزەل وتىنىن پايدالانۋ كەرەك, — دەلىنگەن اقپاراتتا.
قىسقى جولدا ءاۆتوموبيلدىڭ تەجەگىش جولى ايتارلىقتاي ۇلعاياتىنىن ەستە ساقتاۋ قاجەت, سوندىقتان كەنەتتەن قاۋىپ تۋىنداعان جاعدايدا جۇرگىزۋشىنىڭ جىلدامدىقتى ۋاقتىلى تومەندەتۋگە, كولىك قۇرالىن تولىق توقتاتۋعا مۇمكىندىگى بولۋى ءتيىس.
قاۋىپتى مانەۆرلەر جاساۋعا جانە شۇعىل تەجەۋگە بولمايدى — كوكتايعاق جاعدايىندا بۇل ءاۆتوموبيلدى باسقارۋ مۇمكىندىگىن جوعالتۋعا جانە جول-كولىك وقيعالارىن جاساۋعا اكەپ سوعۋى مۇمكىن. جاياۋ جۇرگىنشىلەر دە وتە مۇقيات بولۋى كەرەك. جولدى تەك بەلگىلەنگەن ورىنداردا ءوتۋ قاجەت. سونىمەن قاتار كولىك جۇرگىزۋشىلەرىنىڭ ولاردى بايقاعانىنا جانە جىلدامدىقتى تومەندەتىپ, جاياۋ جۇرگىنشىلەر وتپەسىنە دەيىن توقتاۋعا مۇمكىندىگى بار ەكەندىگىنە كوز جەتكىزۋ ماڭىزدى, — دەپ ەسكەرتەدى ءىىم.
پوليتسيا اۆتوكولىك جوعارى قاۋىپتىلىك كوزى, سوندىقتان جول قوزعالىسىنا قاتىسۋشىلاردىڭ قاۋىپسىزدىگى بەلگىلەنگەن ەرەجەلەردىڭ ساقتالۋىنا بايلانىستى ەكەنىن ايتتى.
