Jańalyqtar
Uly dala ustazy: Qandastar arasynda ótken halyqaralyq baıqaý máresine jetti
«Uly dala ustazy» halyqaralyq baıqaýynyń qorytyndysy jarııalandy, dep habarlaıdy QazAqparat «Otandastar qory» baspasóz qyzmetine silteme jasap.
Ultymyzdyń uly tulǵasy, asa kórnekti aǵartýshy Ybyraı Altynsarınniń 180 jyldyǵyna oraı «Otandastar qory» ótkizgen «Uly dala ustazy» halyqaralyq baıqaýy márege jetip, jeńimpazdar anyqtaldy. Saıys talabyna saı taqyryptyq shyǵarmalar men Ybyraı Altynsarın óleńderi jatqa oqylǵan beınerolıkter qabyldanyp, qazylar alqasynyń ádil irikteýinen ótkizildi. Baıqaýǵa alys-jaqyn 10 memleket pen tarıhı otany Qazaqstanǵa oralǵan qandas oqýshylardan uzynsany 150-den astam materıal tústi. Júzden júırik, myńnan tulpar shyqqan 3 úmitker úzdik dep tanyldy. I orynǵa Araı Muqarapqyzy (Mońǵolııa), II orynǵa Bekzat Jumabekova (О́zbekstan), III orynǵa Ýmıd Nýrı (Aýǵanstannan oralǵan qandas) ıe boldy. Júldegerlerge aldaǵy 2022 jylǵy jaz maýsymynda el ordasy — Nur-Sultan qalasyndaǵy Nazarbaev zııatkerlik mektebiniń jazǵy demalys lagerine tegin joldama beriledi. «Sonymen qatar, ultymyzdyń uly tulǵasyn ulyqtaýǵa belsene atsalysyp, baıqaýda baq synasqan barsha qatysýshylarǵa rııasyz rızalyq bildiremiz. Ozat oqýshylar men balǵyn balalardy baptaǵan ulaǵatty ustazdarǵa alǵys aıtamyz» deıdi Otandastar qorynan.
