جاڭالىقتار
اۋعانستاننان 35 قانداس قازاقستانعا ورالدى
ءوتىنىش بەرۋشىلەردىڭ ەتنيكالىق سايكەستىگىن راستاۋ جانە قانداستاردى قايتارۋ جۇمىستارى جالعاسۋدا.
قازاقستان پرەزيدەنتى قاسىم-جومارت توقاەۆتىڭ تاپسىرماسىنا سايكەس اۋعانستاننان 35 قانداستىڭ تاريحي وتانىنا ورالۋى ۇيىمداستىرىلدى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.
«قورعانىس مينيسترلىگىنىڭ ارنايى ۇشاعى 9 قىركۇيەكتە كابۋلدان الماتى قالاسىنىڭ اۋەجايىنا 41 جولاۋشىمەن ۇشىپ كەلدى, ولاردىڭ ىشىندە قازاقستاننىڭ 4 ازاماتى, قىرعىزستاننىڭ 1 ازاماتى جانە قازاقستاندا تۇراقتى تۇراتىن 1 اۋعان بار. كەلگەن جولاۋشىلار كارانتيننەن ءوتۋ ءۇشىن ۋاقىتشا وقشاۋلانادى.
ەۆاكۋاتسيالىق رەيستى ۇيىمداستىرۋ «تاليبان» قوزعالىسىمەن ۇيلەستىرىلىپ جۇزەگە اسىرىلدى», — دەلىنگەن حابارلامادا.
قازاقستاننىڭ كابۋلداعى ەلشىلىگى قالىپتى رەجيمدە جۇمىس ىستەيدى جانە اۋعانستاندا تۇراتىن قانداستارمەن تۇراقتى بايلانىستا. ءوتىنىش بەرۋشىلەردىڭ ەتنيكالىق سايكەستىگىن راستاۋ جانە قانداستاردى قايتارۋ جۇمىستارى جالعاسۋدا.
بۇعان دەيىن حابارلانعانداي, 18 تامىزدا قازاقستان اۋعانستاننان ءوزىنىڭ 25 ازاماتىن جانە قىرعىزستان, رەسەي مەن ليتۆانىڭ 16 ازاماتىن ەۆاكۋاتسيالادى. بۇدان باسقا, الماتىعا كابۋلدان اۋعانستانعا كومەك كورسەتۋ جونىندەگى بۇۇ ميسسياسى (UNAMA) جانە باسقا دا حالىقارالىق ۇيىمداردىڭ كەڭسەلەرى ۋاقىتشا كوشىرىلدى.
