Jańalyqtar
Aýǵanstannan 35 qandas Qazaqstanǵa oraldy
О́tinish berýshilerdiń etnıkalyq sáıkestigin rastaý jáne qandastardy qaıtarý jumystary jalǵasýda.
Qazaqstan prezıdenti Qasym-Jomart Toqaevtyń tapsyrmasyna sáıkes Aýǵanstannan 35 qandastyń tarıhı otanyna oralýy uıymdastyryldy, dep habarlady syrtqy ister mınıstrliginiń baspasóz qyzmeti.
«Qorǵanys mınıstrliginiń arnaıy ushaǵy 9 qyrkúıekte Kabýldan Almaty qalasynyń áýejaıyna 41 jolaýshymen ushyp keldi, olardyń ishinde Qazaqstannyń 4 azamaty, Qyrǵyzstannyń 1 azamaty jáne Qazaqstanda turaqty turatyn 1 aýǵan bar. Kelgen jolaýshylar karantınnen ótý úshin ýaqytsha oqshaýlanady.
Evakýaııalyq reısti uıymdastyrý «Talıban» qozǵalysymen úılestirilip júzege asyryldy», — delingen habarlamada.
Qazaqstannyń Kabýldaǵy Elshiligi qalypty rejımde jumys isteıdi jáne Aýǵanstanda turatyn qandastarmen turaqty baılanysta. О́tinish berýshilerdiń etnıkalyq sáıkestigin rastaý jáne qandastardy qaıtarý jumystary jalǵasýda.
Buǵan deıin habarlanǵandaı, 18 tamyzda Qazaqstan Aýǵanstannan óziniń 25 azamatyn jáne Qyrǵyzstan, Reseı men Lıtvanyń 16 azamatyn evakýaııalady. Budan basqa, Almatyǵa Kabýldan Aýǵanstanǵa kómek kórsetý jónindegi BUU Mıssııasy (UNAMA) jáne basqa da halyqaralyq uıymdardyń keńseleri ýaqytsha kóshirildi.
