«KPI Inc.» جشس قىزمەتكەرلەرى ارنايى باعدارلاما ارقىلى باسپانالى بولدى

28 شىلدە كۇنى «Kazakhstan Petrochemical Industries Inc.» جشس قىزمەتكەرلەرىنە اتىراۋ قالاسىنداعى «فرانتسۋز ورامى» تۇرعىن ءۇي كەشەنىنەن جاڭا پاتەرلەردىڭ كىلتى تابىستالدى.

سالتاناتتى راسىمگە «قازمۇنايگاز» ۇك اق باسقارما توراعاسى ماعزۇم مىرزاعاليەۆ جانە «Kazakhstan Petrochemical Industries Inc.» جشس باسقارما توراعاسى دانيار تيەسوۆ قاتىستى.
وندىرىسكە ىسكەر مامانداردى تارتۋ جانە ولاردى ىنتالاندىرۋ ماقساتىندا «KPI Inc.» جشس تۇرعىن ءۇي باعدارلاماسىن دايىنداعان. جاڭا تۇرعىن ءۇي پايىزسىز جانە باستاپقى جارناسىز ءبولىپ تولەۋ ارقىلى بەرىلەدى.

«جاقىن ارادا ەلىمىزدە ۇلكەن ءوندىرىس — پوليپروپيلەن وندىرەتىن زاۋىت ىسكە قوسىلادى. بولاشاقتا ونى تۇراقتى پايدالانۋ ءۇشىن بىزگە قىزمەتكەرلەردىڭ مول تاجىريبەسى مەن ساباقتاستىعى وتە ماڭىزدى. سوندىقتان «سامۇرىق-قازىنا» قورى, «قازمۇنايگاز» جانە KPI كومپانياسى ارنايى تۇرعىن ءۇي باعدارلاماسىن ازىرلەپ, وندىرىستەگى قىزمەتكەرلەرگە قولداۋ كورسەتۋ جانە قاجەتتى جاعداي جاساۋ ءۇشىن جاڭا پاتەرلەردى ۇسىندى», — دەپ اتاپ ءوتتى م. مىرزاعاليەۆ.

جايىق وزەنىنىڭ جاعاسىندا ورنالاسقان از قاباتتى تۇرعىن ءۇي كەشەنىنىڭ 1, 2 جانە 3 بولمەلى پاتەرلەرى تازا, ارلەنگەن كۇيىندە تاپسىرىلدى.
اباتتاندىرىلعان اۋلادا بالالار الاڭى, باسكەتبول-ۆولەيبول سپورت الاڭدارى جانە جەكە قازاندىعى ورناتىلعان.

اتىراۋعا ساپارى بارىسىندا م.مىرزاعاليەۆ پوليپروپيلەن وندىرەتىن «KPI Inc.» جشس زاۋىتىنا دا باردى.

وندا پروپيلەندى پوليمەرلەۋ, قويمادا پروپان مەن دايىن ءونىمدى ساقتاۋ (بۋىپ-ءتۇيۋ جانە بۋىپ-ءتۇيۋ تورابى), ورتالىق وپەراتورلىق جانە اكىمشىلىك-تۇرمىستىق كورپۋس جۇمىسىمەن تانىستى.

قازىرگى ۋاقىتتا جوبانىڭ جالپى پروگرەسى 99,40%-دى قۇرايدى, زاۋىتتا ىسكە قوسۋ-رەتتەۋ جۇمىستارى اياقتالۋدا. كاسىپورىن قۋاتى جىلىنا 500 مىڭ توننا پوليپروپيلەن وندىرە الادى.

بۇدان باسقا, باسقارما توراعاسى «بۋتاديەن» جوباسىن ىسكە اسىرۋعا ارنالعان الاڭعا باردى. «بۋتاديەن» جشس باس ديرەكتورى دياز ديانوۆ قمگ باسشىلىعىنا بولاشاق نىساننىڭ ورنىندا جۇرگىزىلەتىن جۇمىستاردى تانىستىردى.

ەستەرىڭىزگە سالا كەتەيىك, 2021 جىلدىڭ قاراشا ايىندا «قازمۇنايگاز» بەن «تاتنەفت» كومپانياسى بۋتاديەن كاۋچۋكتەرىن ءوندىرۋ بويىنشا بىرلەسكەن كاسىپورىن قۇردى. كاسىپورىننىڭ جوسپارلانعان قۋاتى – جىلىنا 66 مىڭ تونناعا دەيىن بۋتاديەن مەن 83 مىڭ تونناعا دەيىن سينتەتيكالىق كاۋچۋك جانە باسقا دا ونىمدەر ءوندىرۋ.

جوبانىڭ الدىن الا قۇنى 916 ملن اقش دوللارعا باعالاندى, اياقتالۋ مەرزىمى — 2025 جىل.
قازىرگى ۋاقىتتا جوبا بويىنشا گەودەزيا جانە گەولوگيا بويىنشا جۇمىستار جۇرگىزىلدى, كاسىپورىن وندىرىستىك وبەكتىلەر مەن جالپى زاۋىتتىق شارۋاشىلىقتى جوبالاۋعا كىرىستى.

بۋتاديەن كاۋچۋكتەرىن وندىرۋگە ارنالعان شيكىزات قازاقستاننىڭ تەڭىز جانە كورولەۆ كەن ورىندارىنان جەتكىزىلەدى, دەپ بولجانۋدا. دايىن ءونىمدى قاراعاندى وبلىسىنداعى شينا زاۋىتىنا, سونداي-اق ەۋروپا ەلدەرىنە, رەسەيگە, قىتايعا, تۇركياعا جانە ت. ب. ەلدەرگە ەكسپورتتاۋ جوسپارلانىپ وتىر.

پوليپروپيلەن وندىرەتىن زاۋىت جانە «بۋتاديەن» جوباسى ينتەگراتسيالانعان گاز-حيميا كەشەنىنىڭ (يگحك) اۋماعىندا ىسكە اسىرىلۋدا.