«Ádildik jáne О́rkendeý» Qoǵamdyq qorynyń qoldaýymen jınalǵan gýmanıtarlyq júk Túrkistannan Qulsaryǵa jetti

Sáýirdiń 14-i kúni «Kıeli Túrkistannan Qulsaryǵa» degen ataýmen Qulsary qalasyna 30 tonnalyq gýmanıtarlyq kómek jóneltildi. Kúni keshe azyq-túlik, gıgıenalyq zattar, qaıyq, kúrek, qazan-oshaq syndy qajetti zattar tıelgen júk kóligi dittegen jerine jetti. Bul ıgi shara túrkistandyq turǵyndar jáne «Ádildik jáne О́rkendeý» Qoǵamdyq qorynyń uıytqy bolýymen qolǵa alyndy. Qarǵyn sýdan zardap shekken otandastarymyzǵa jiberilgen gýmanıtarlyq júk arasynda sýda júretin arnaıy kıimder men etikter de boldy.

«Assalaýmaǵaleıkým Qazaq eli! Barsha túrkistandyqtar! Amanattaryńyzdy Qulsary qalasyna jetkizdik. Túrkistannan shyqqan júk Qulsary qalasyna aman-esen jetti. Qulsary qalasynyń azamattaryna tapsyrdyq. Barsha qatysqan qala turǵyndary sizderge aıtar alǵysym zor. Bizge qoldaý kórsetken «Ádildik jáne О́rkendeý» Qoǵamdyq qoryna alǵys bildiremiz! Biz, túrkistandyqtar, batystyqtarmen birgemiz!» — dedi Túrkistannyń qoǵam belsendisi.

Túrkistan qalasy turǵyndarynyń tabıǵat apaty bolǵan aımaqtarǵa degen kómegi tolastaǵan joq. Kúnine ár móltek aýdannyń ózinen júk kólikteri batys, shyǵys, soltústikke gýmanıtarlyq kómektermen ketip jatyr.

«El aǵalary men órimdeı jastar jumylyp, kólikterdi toltyrýǵa kún-tún demeı eńbek etýde. Halyqtyń yntymaǵy men berekesi jáne shynaıy tilegine artynyń jaqsylyǵyn berse eken dep, biz de birge shapqylap júrmiz. О́zim bizdiń oblystan jetekshilik etetin «Ádildik jáne О́rkendeý» Qorynyń qarjylaı úles qosýymen 30 tonnadaı júk Qulsaryǵa bardy. Uıymshyl, berekeli túrkistandyqtardyń tirligi toqtamaı, birligimiz berik bolsa, apattyń arty ońaı eńseriler!» -dedi «Ádildik jáne О́rkendeý QQ Túrkistan oblysyndaǵy ókildiginiń jetekshisi Ádemaý Tolysbaeva.

Esterińizge sala keteıik, sý tasqyny kezinde «Ádildik jáne О́rkendeý» Qorynyń barlyq 7 qoǵamdyq qabyldaýy qıyn ómirlik jaǵdaıǵa tap bolǵan óńir turǵyndaryna gýmanıtarlyq júkterdi jınaý jáne jetkizý, sondaı-aq eriktilerdi úılestirý mindetterin qolǵa aldy. Qoǵam belsendileri bógetter men qorǵanys qurylystaryn salýǵa qatysady. Sonymen qatar Qoǵamdyq qor qyzmetkerleri sý tasqynynan zardap shekken oblys turǵyndarynyń atyna bir kúndik tabysyn aýdardy.