قانداستى سابىلتقان «مارتەبە»

سوڭعى كەزدەرى ورالمان تاقىرىبى كۇردەلىلەنە, كۇننەن كۇنگە ۋشىعا ءتۇستى. سايكەسىنشە كەيبىر قۇزىرلى مەكەمەلەر مەن ورگانداردى مەزى ەتكەنى دە بار. نە وڭ شەشىمىن تاپپايتىن, ناقتى زاڭ تەتىكتەرىنە ساي كەلمەيتىن ءار الۋان ماسەلەلەر كۇن وتكەن سايىن كوبەيىپ كەلەدى. ورالماندار جايلى كەشەگى زاڭ بۇگىنگە, بۇگىنگى زاڭ ەرتەڭگە جارامايتىن حالگە جەتتىك. سەبەپ كوپ. كۇن وتكەن سايىن قيىندىقتار دا قۇبىلىپ كەلەدى. ەلمىز بولسا سوناۋ جىلدارداعى زاڭ شەڭبەرىندە جۇمىس اتقارادى. سالدارىنان وتباسى ەكىگە جارىلىپ, ءبىرى شاراسىز قىتاي اسىپ ارى كەتسە, ءبىرى قاشىپ بەرى كەلىپ جاتقاندار كوپ. كەلىپ الىپ, قر ازاماتتىعىن الا الماي سابىلىپ جۇرگەندەرى قانشاما? ءتىپتى, كەشە قانداستار يگىلىگى ءۇشىن «ورالمان» دەپ بەرگەن مارتەبەنىڭ ءوزى, بۇگىن باستارىنا بالە بولىپ جابىسقانى راس. «ايتا ايتا التايدى, جامال اپام قارتايدى» دەمەكشى, جامال اپامىزدى قارتايعان ۇستىنە قارتايتىپ, «ادىرنا» بىرلەستىگى جانە ءبىر جيىن وتكىزدى. تۋرا سول – «مارتەبە» حاقىندا. جيىنعا ءدال وسى ورالمان كۋالىكتىڭ سالدارىنان, ارىسى 2007-ءشى, بەرىسى 2016 جىلدان بەرى ەلىمىز ازاماتتىعىن الا الماي جۇرگەن 50-گە تارتا قانداسىمىز كەلدى. مۇڭى ءبىر, زارى بولەك. كەيبىرى جەمقورلارعا جەم بولعان, ەندى ءبىرى دەلدالدارعا كەز بولعان. ايتەۋىر نە كەرەك «سۇيىكتى» ورالمان كۋالىكتەرىنىڭ ۋاقىتى ءوتىپ كەتىپ, قازاقستان رەسپۋبليكاسىنىڭ ازاماتى دەگەن «قۇرمەتتى» اتاققا قولدارى جەتپەي جۇرگەندەر.
ماسەلە بار. تۇيىتكىل تالقىلاندى ءھام انىقتالدى. ەندى نە ىستەمەك كەرەك? «ادىرنا» بىرلەستىگىنىڭ قولىندا ماسەلەنى بىردەن شەشە سالاتىن مۇمكىندىك جوق اتتەڭ! ايتپەگەندە جىلاپ كەلگەن ءبىراز قانداستىڭ كوز جاسىن ءسۇرتىپ, قولىنا ازاماتتىقتى ۇستاتا سالار ەدىك. جانە ءبىر وكىنىشتىسى جيىنعا شاقىرىلعان قۇزىرلى ورگان وكىلدەرى كەلە الماي قالدى. اۋەلگى ماقسات – قانداستاردىڭ قازىرگى حالىن ءوز كوزدەرىمەن كورسىن, ەت قۇلاقتارى مەن ەستىسىن دەگەن ەدىك. «كەلىسىپ پىشكەن تون كەلتە بولماس» دەمەكشى, ماماندارمەن كەلىسە وتىرىپ, جوعارىعا حات جولداساق دەگەنبىز. ءيا ونسىز سولاي بولدى. 50-گە جۋىق ارىز جازىلىپ, حات جوباسى تالقىلاندى. تەك قۇزىرلى مەكەمە وكىلىنسىز. بىراق, ەلىم دەپ كەلگەن وزەكتى جاننىڭ مۇڭ-زارىنا قر پارلامەنتى قۇلاق اسىپ, وزەكتەن تەپپەيدى دەگەن ۇمىتتەمىز. الداعى ۋاقىتتا سول حاتتار مەن وتىنىشتەردى رەتتەپ, جيناقتاپ وزدەرىڭىزگە ۇسىنامىز. جانە بۇل تەك ءبىزدىڭ جوبامىزدىڭ باسى عانا. ەندى ەكى اي ىشىندە بۇدان دا قوردالانعان ماسەلەلەردى زەرتتەپ, زەردەلەپ, تالقىعا سالامىز. الايدا تالقىعا سالىپ قانا قاراپ وتىرۋ قانداستاردى قاجىتقان — «ۇپاي جيناۋدىڭ» ءبىر ءتۇرى عانا. سوندىقتان بەلگىلى ناتيجەگە قول جەتكىزگەنشە توقتامايمىز دەگەن ماقساتتامىز.
ەستەرىڭىزگە سالا كەتسەك, وسى جىلدىڭ مامىر, ماۋسىم ايلارىنان بەرى الماتى قالاسى, ىشكى ساياسات باسقارماسىنىڭ قولداۋىمەن «ادىرنا» بىرلەستىگى «وتان وتتان دا ىستىق!» جوباسىن قولعا العان. جوبا اياسىندا قانداستارعا جۇمىسپەن قامتۋ جانە تىلدىك, قۇقىقتىق كومەك كورسەتۋدى, قۇجاتتارىنا كومەكتەسىپ, ماسەلەلەردى انىقتاۋدى ءوز مىندەتتەرىنە العان-دى. سونداي-اق, قانداستارعا قۇقىقتىق, اقپاراتتىق باعىتتاعى «qandastar.kz» سايتى مەن جەدەل جەلى تەلەفونىن ىسكە قوسقان.
قۇرمەتوللا مۇحامەتحان ۇلى, «qandastar.kz»