نۇر-سۇلتانداعى ءورت: قۇتقارۋشىلار تەرەزەدەن سەكىرگەن جۇكتى ايەلدى قاعىپ الدى

ۇلتتىق ۇلان ساربازدارى نۇر-سۇلتانداعى ورتەنگەن جاتاقحانانىڭ ءتورتىنشى قاباتىنان سەكىرگەن ءۇش بالا مەن جۇكتى ايەلدى كورپەمەن قاعىپ العان, دەپ حابارلايدى Stan.kz ءتىلشىسى.

بۇگىن تاڭەرتەڭ ۇلتتىق ۇلاننىڭ №6 636 اسكەري ءبولىمىنىڭ جانىندا №4 جاتاقحانادان ءورت شىقتى. قىزىل جالىندى بايقاعان ءبىر توپ سارباز ۆزۆود كاپيتانى شىڭعىس قايىرجانوۆتىڭ باسشىلىعىمەن 15 ادامدى قۇتقارىپ قالدى. 6 639 اسكەري ءبولىمىنىڭ اتقىشتار روتاسىنىڭ جەدەل شەشىم قابىلداپ, ارەكەت ەتۋىنىڭ ارقاسىندا ازاماتتىق تۇلعالار قۇتقارىلىپ, ولارعا العاشقى كومەك كورسەتىلدى.

«ءبارى اياق استىنان بولدى. ءبىز باقىلاۋ-تەكسەرۋ ساباعىندا جۇرگەنبىز. كەنەت جانىمىزداعى جاتاقحانانىڭ ەكىنشى قاباتىنان شىعىپ جاتقان قويۋ ءتۇتىندى بايقادىق. اسكەري قىزمەتشىلەر توبى ءورت وشاعىنا قاراي سوڭىمنان جۇگىردى. جاتاقحاناعا جەتكەنىمىزدە ءىشىن تۇگەلدەي ءتۇتىن باسقان ەكەن. ادامدار كومەك سۇراپ, ءبىرى تەرەزەدەن سەكىرىپ جاتتى. قاراۋىل باستىعى نۇرعازى ەرجانوۆ ەكەۋىمىز جانە باسقا دا قىزمەتشىلەر تۇرعىندارعا كەرىپ ۇستايتىن ماتەريال تاستاۋدى سۇرادىق. كورپەنى كەرىپ ۇستاپ ادامداردى قاعىپ الدىق. وسى تاسىلمەن 4-قاباتتا قالعان ءۇش بالانى جانە ءبىر جۇكتى ايەلدى قۇتقاردىق» — دەيدى كاپيتان قايىربەكوۆ.

ءورت ءسوندىرۋ جاساعى كەلگەنشە ۇلتتىق ۇلان ساربازدارى قويۋ تۇتىنگە قاراماي عيمارات ىشىندە قالعان باسقا تۇرعىنداردى سىرتقا شىعاردى.

«قانشا ەكەنىن بىلمەيمىن. جالپى 15 ادامدى قۇقارعان شىعارمىز. ولارعا العاشقى مەديتسينالىق كومەك كورسەتىپ, جەدەل جاردەم كەلگەن سوڭ ءيىس تيۋدەن زارداپ شەككەندەردى ولارعا تابىستادىق», — دەدى قايىربەكوۆ.

ەستەرىڭىزگە سالا كەتسەك, ءورت سوندىرۋشىلەردىڭ بارلىق ءىس-قيمىلى جاتاقحانانىڭ جوعارعى قاباتتارىنان ءۇش باعانالى, 3 شابۋىل ساتىسى, قۇتقارۋ ارقاندارى جانە ال-30 كومەگىمەن ادامداردى قۇتقارۋعا باعىتتالدى. سونداي-اق زارداپ شەككەندەردى ىزدەستىرۋ ءۇشىن گاز-تۇتىننەن قورعاۋ قىزمەتىنىڭ بۋىندارى قوسىمشا جۇمىلدىرىلدى.

ءورت سوندىرۋشىلەردىڭ جەدەل جانە ۇيلەسىمدى ءىس-قيمىلدارى نەگىزىندە 32 ادام قۇتقارىلدى, ونىڭ ىشىندە 28-ءى بالا. ءورت تولىعىمەن ءسوندىرىلدى.

ءورت سوندىرۋگە جەكە قۇرامنان 66 ادام جانە ءورت ءسوندىرۋ قىزمەتىنىڭ 18 تەحنيكاسى جۇمىلدىرىلدى. ءورتتىڭ سەبەبى انىقتالىپ جاتىر.

ماقالاعا تولىق سىلتەمە: http://stan.kz/nyr-syltandagi-ort-kytkarushilar-terezeden-sekirgen-zhukti-ayeldi-kagip-aldi-video-315229/?fbclid=IwAR3Jc7r4P5MGgzr0DT5pDJ_tpwJOHzn2UVpbCbnIe5xHnNx3p5MB5DoXEYA