قازاقستان «ءبىر بەلدەۋ, ءبىر جول» جوباسىن ەكولوگيالاندىرۋدىڭ كاتاليزاتورىنا اينالادى — ايگۇل سولوۆەۆا

قازاقستان «ءبىر بەلدەۋ, ءبىر جول» جوباسىن ەكولوگيالاندىرۋدىڭ كاتاليزاتورىنا اينالادى. بۇل تۋرالى بۇگىن XII استانا ەكونوميكالىق فورۋمى بارىسىندا «قازاقستاننىڭ ەكولوگيالىق ۇيىمدارى قاۋىمداستىعى» زاڭدى تۇلعالار بىرلەستىگىنىڭ باسقارما ءتورايىمى ايگۇل سولوۆەۆا مالىمدەدى.

«بۇگىندە ورتالىق ازيا ەلدەرى ءۇشىن اۋىل شارۋاشىلىعىن كليماتتىق وزگەرىستەرگە بەيىمدەۋ ماسەلەسى بارىنشا وزەكتى بولىپ وتىر. جاسىل تەحنولوگيالار, ەكولوگيالىق سەرتيفيكاتتاۋ مەن تاڭبالاۋ ءۇشىن حالىقارالىق ستاندارتتاردى دامىتۋ قاجەت. ماڭىزدى ترەند — «جىبەك جولىن» جاسىل دامىتۋ. ورتالىق ازيا ەلدەرى قىتايدان ەۋروپاعا جىبەك جولىنىڭ ماڭىزدى بۋىنى سانالادى, زور تابيعي-رەسۋرستىق, ەنەرگەتيكالىق, ترانزيتتىك, تۋريستىك الەۋەتكە يە. قىتاي «جىبەك جولىنىڭ جاسىل دامۋ كواليتسياسى» تۇعىرناماسىن قۇرۋدى ۇسىندى. وعان ەلدەردىڭ ۇكىمەتتىك ەمەس ۇيىمدارىن دا شاقىرىپ وتىر. كەلەشەكتە قازاقستان مەن ورتالىق ازيا «ءبىر بەلدەۋ, ءبىر جول» مەگاجوباسىن ەكولوگيالاندىرۋدىڭ كاتاليزاتورىنا اينالا الادى جانە قىتايدىڭ «جاسىل كوپىر» سەرىكتەستىك باعدارلاماسىنا قاتىسۋىن ۇيىمداستىرۋ كەرەك», — دەدى ول «ورتالىق ازيا مەن قازاقستانداعى تۇراقتى «جاسىل» ءوسىمدى قامتاماسىز ەتۋدەگى حالىقارالىق ىنتىماقتاستىقتى دامىتۋ» تاقىرىبىنداعى سەسسيا بارىسىندا.

وسى رەتتە قاۋىمداستىق ءتورايىمى «ءبىر بەلدەۋدىڭ» جاسىل ەلەمەنتتەرىنە ەنەرگيا ۇنەمدەيتىن جانە تومەن كومىرسۋتەكتىك كولىكتىڭ جاڭا تۇرلەرى, جۇكتەردىڭ جالپى ەكولوگيالىق تاڭبالانۋى, ۇزاققا ءتوزىمدى جاڭا جول جابىندىلارى كىرەتىندىگىن ايتتى. سونىمەن قاتار ول جاڭاراتىن ەنەرگيا كوزدەرىنەن الىنعان ەلەكتر ەنەرگياسىن الماسۋ جانە ەكسپورتتاۋ ءۇشىن جىبەك جولى ەلدەرىنىڭ ەنەرگيا جۇيەلەرىن بىرىكتىرۋ ماڭىزدىلىعىن اتاپ ءوتتى.

«ورتالىق ازيانىڭ بارلىق ەلدەرى, اسىرەسە قازاقستان مەن تاجىكستاننىڭ جاڭاراتىن ەنەرگيا كوزدەرىن وندىرۋگە الەۋەتى جوعارى. سوندىقتان جىبەك جولى ەلدەرىنىڭ ەنەرگيا جۇيەسىن بىرىكتىرۋدىڭ كەلەشەگى زور. ول جاڭاراتىن ەنەرگيا كوزدەرىن دامىتۋعا تىڭ سەرپىن بەرىپ, تۇتىنۋشىلارى ءۇشىن ەلەكتر ەنەرگياسىنىڭ وزىندىك قۇنى مەن تاريحىن تومەندەتۋگە, وزگە ەلدەرگە ەكسپورتتاۋعا مۇمكىندىك جاسايدى», — دەدى ايگۇل سولوۆەۆا.

دەرەككوز: https://www.inform.kz/kz/kazakstan-bir-beldeu-bir-zhol-zhobasyn-ekologiyalandyrudyn-katalizatoryna-aynalady-aygul-solov-eva_a3527418