«ايەلى قايتىس بولىپ, جالعىز قالدى»: بيبىگۇل تولەگەنوۆا مەن دىنمۇحامەد قوناەۆتى نە بايلانىستىرادى

فوتو: اشىق دەرەككوز

بيبىگۇل تولەگەنوۆا مەن دىنمۇحامەد قوناەۆتى نە بايلانىستىرادى? ەكەۋىنىڭ قارىم-قاتىناسى تۋرالى اتى اڭىزعا اينالعان ءانشىنىڭ ءوزى ايتىپ بەردى, دەپ حابارلايدى Skifnews.kz اقپارات پورتالى.

حالىق ءارتىسىنىڭ ايتۋىنشا, ول ساياساتكەر دىنمۇحامەد قوناەۆپەن بيلىكتەن كەتكەن كەزىندە جاقسى ارالاسقان. بۇل تۋرالى تولەگەنوۆا دينارا ساتجانعا بەرگەن سۇحباتىندا ايتتى.

«قوناەۆپەن ول بيلىكتەن كەتىپ قالعان كەزدە ارالاستىم. ايەلى قايتىس بولعاندا جالعىز قالدى. ول ۇيىندە جالعىز تۇراتىن. باسىنان اۋىر كەزەڭ ءوتىپ جاتقانىن كورىپ, جۇرەگىمىز اۋىردى. ول كىسىنىڭ كۇزەتى بولاتىن. وعان سەگىزگە دەيىن عانا كەلۋگە بولاتىن. ساعات سەگىز بولعاندا كۇزەت كەلىپ, كەزدەسۋ ۋاقىتى اياقتالعانىن ايتاتىن. ءبىر رەت ءوزى ماعان قوڭىراۋ شالدى. ابدەن ءىشى پىسقان بولۋ كەرەك. «بيبىگۇل, قىزىم سەن بويداقتاردىڭ شايىن ىشكىڭ كەلمەي مە?» دەپ ەدى. سول ساتتە كونتسەرتتەن ەندى كەلگەنمىن. «ۋاقىتىڭ بولسا, ۇيگە كەل» دەپ شاقىردى. قىزمەتتە بولعاندا كيىمى ءبارى ۇتىكتەلگەن سونداي بەدەلدى كىسى ەدى. ال ۇيىندە قاراپايىم ادام. بىرگە وتىرىپ شاي ءىشىپ, كوپ اڭگىمەلەسەتىن ەدىك», – دەدى ءانشى.