الماتىلىق دارىگەرلەر جەر سىلكىنىسى كەزىندە دە وپەراتسيانى توقتاتپاعان

مەگاپوليستە جەر سىلكىنگەن كەزدە الماتى كوپسالالى كلينيكالىق اۋرۋحاناسىنىڭ دارىگەرلەرى ءۇش ناۋقاسقا وپەراتسيا جاساپ جاتقان.

اۋرۋحانا ءباسپاسوز قىزمەتىنەن اتاپ وتكەندەي, جەر سىلكىنگەن كەزدە مەديتسينا قىزمەتكەرلەرى ءوز ناۋقاستارىن ەۆاكۋاتسيالادى. تەك وتا بولىمىندەگى دارىگەرلەر ءوز ورىندارىندا قالىپ, وپەراتسيانى جالعاستىردى.

«ارينە, جەر سىلكىنىسىن ءبارى سەزدى, بىراق ءبىز جوسپارلى كەسار تىلىگىن جاساپ جاتقانبىز, مەدبيكەلەر وتا ۇستەلىن, انەستەزيولوگ ناۋقاستى ال مەن جاڭا تۋعان قىز بالانى ۇستاپ تۇردىم. باقىتىمىزعا وراي, ءبىز وتانى ءساتتى اياقتاپ, شۇعىل ەۆاكۋاتسيالاندىق», — دەيدى اكۋشەر-گينەكولوگ گۇلجاحان جۇمادۋلاەۆا.

كارديوحيرۋرگ تيمۋر يبراگيموۆتىڭ سوزىنشە, وپەراتسيا ۇستەلىندە 68 جاستاعى ناۋقاس جاتقان.

«بۇل جۇرەك ارتەريالارىنداعى قان اعىمىن قالپىنا كەلتىرۋگە مۇمكىندىك بەرەتىن جانە جۇرەكتىڭ يشەميالىق اۋرۋىن ەمدەۋدىڭ حيرۋرگيالىق ادىستەرىنە جاتاتىن وتا ەدى. ەگەر ءبىز كارديوحيرۋرگتار وپەراتسيانى توقتاتاتىن بولساق, ونىڭ سالدارى ءسوزسىز ناشار بولار ەدى. ارينە, جەر سىلكىنىسى قورقىنىشتى بولدى, ءبىز جانىمىزدا تۇرعان بارلىق ادامدار ءۇشىن ۋايىمدادىق, بىراق ءبىزدىڭ باستى ماقساتىمىز توتەنشە جاعدايدا ناۋقاستىڭ ءومىرىن ساقتاپ قالۋ بولدى», — دەدى كارديوحيرۋرگ تيمۋر يبراگيموۆ.

ال تراۆماتولوگ دارىگەر بەكزات بەيسەنوۆ سان سۇيەگىنە وستەوسينتەز وپەراتسياسىندا بولعان.

ءبىز سان سۇيەگى سىنعان ايەلگە وتا جاساپ جاتقانبىز, جەر سىلكىنىسى كەزىندە بارلىق مەديتسينا قىزمەتكەرلەرى ءوز ورىندارىندا قالىپ, حيرۋرگيالىق ارالاسۋدى جالعاستىردى», — دەپ اتاپ ءوتتى دارىگەر.