جاڭالىقتار
اتىراۋدا شەنەۋنىكتەر توبەلەسىپ, بىرەۋى اۋرۋحاناعا ءتۇستى
فوتو: اشىق دەرەككوز
اتىراۋ وبلىسىندا مەملەكەتتىك كىرىستەر دەپارتامەنتى باسشىسىنىڭ ورىنباسارى كولىك پروكۋراتۋراسى قىزمەتكەرىمەن توبەلەستەن كەيىن كوماعا ءتۇستى, دەپ حابارلايدى qandastar.kz
جەلىدە 28 قاڭتاردا اتىراۋداعى Beer house villa ويىن-ساۋىق ورنىندا پروكۋراتۋرا قىزمەتكەرى اسقار جانىسباەۆ پەن مەملەكەتتىك كىرىستەر دەپارتامەنتىنىڭ باسشىسى ايدىن ساۋدانبەكوۆ, ونىڭ ورىنباسارى ءالىبي باعىتجانوۆ اراسىندا توبەلەس بولعانى تۋرالى اقپارات تارادى. توبەلەس سالدارىنان وبلىستىق مەملەكەتتىك كىرىستەر دەپارتامەنتى باسشىسىنىڭ ورىنباسارى باعىتجانوۆ جاراقات الىپ, كوماعا تۇسكەن.
قىلمىستىق كودەكستىڭ 106-بابى “دەنساۋلىققا قاساقانا اۋىر زيان كەلتىرۋ” بويىنشا ءىس قوزعالدى.
باس كولىك پروكۋراتۋراسىنىڭ ءباسپاسوز قىزمەتى اقپاراتتى راستاپ, تەرگەۋ جۇرگىزىلىپ جاتقانىن مالىمدەدى.
«اتىراۋ وبلىسىنىڭ پوليتسيا دەپارتامەنتى مەملەكەتتىك كىرىستەر دەپارتامەنتى قىزمەتكەرىنىڭ دەنە جاراقاتىن الۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىپ جاتىر. بارلىق ءمان-جايدى انىقتاۋ ماقساتىندا باس كولىك پروكۋراتۋراسى قىزمەتتىك تەكسەرۋ جۇرگىزىپ جاتىر», – دەدى باس كولىك پروكۋراتۋراسىنىڭ رەسمي وكىلى الميرا بەكجان.
