«باسىڭىزعا قاتتى دوپ تيگەن بە?!». فۋتبولشى نۇرالى ءالىپ قازاقشا سۇراق قويعانداردى شەتتەتتىپ, سىنعا ۇشىرادى

قازاقشا سۇراق قويۋ حايپ پا?!

قازاقستاندىق فۋتبولشى نۇرالى ءالىپتىڭ مالىمدەمەسى قازىر الەۋمەتتىك جەلىدە قىزۋ تالقىلانىپ, كوپشىلىكتىڭ اشۋىن تۋعىزدى. ول ۇلتتىق قۇرامانىڭ باس باپكەرى ستانيسلاۆ چەرچەسوۆقا قازاقشا سۇراق قويعان ءجۋرناليستى «حايپ جاساعىسى كەلدى» – دەيدى. بۇعان قوسا, «قازاقستانداعى تىلشىلەردىڭ ءبارى ورىسشا بىلەدى» – دەپ, تاعى قويىپ قالدى. بۇنىڭ بارلىعىن رەسەيدەگى پودكاست الاڭدا ايتىپ وتىر.

نۇرەكە, سىزگە نە بولدى? باسىڭىزعا قاتتى دوپ تيگەن بە? قازاقستانداعى ءباسپاسوز ءماسليحاتىندا قازاق تىلىندە سۇراق قويۋ راسىمەن حايپ پا? ەندى نە ىستەيمىز? ءوزىڭ دە «زەنيتكە» اۋىسقان العاشقى كۇندەرى ورىسشا سۇراققا قازاقشا عانا جاۋاپ بەرىپ ەدىڭ عوي. سول كەزدە ساعان «حايپ جاسادى» دەمەدىك. كەرىسىنشە, مەملەكەتتىك ءتىلدىڭ مارتەبەسىن ارتتىردى دەپ قۋاندىق. ال, ەندى ءوز ەلىمىزدە ءوز تىلىمىزدە سۇراق قويعانىمىزدى تومەن كورىپ وتىرسىڭ.

بۇنى قالاي تۇسىنسەك بولادى? الدە, تەك قاسىڭداعى انا ەكەۋىنە جاعۋ ءۇشىن سولاي سويلەدىڭ بە? «ءوز ۇلىڭدى بوتەن ۇيدەن تويدىرما» – دەيتىن ناقىل ءسوز بار ەدى. تويىنعانىڭ با? قازىر جەپ وتىرعان نانىڭدى, قازىرگى تاۋىپ وتىرعان تابىسىڭدى مەملەكەتتىك تىلدەن, ونىڭ ارعى جاعىندا, ۇلت مۇددەسىنەن جوعارى قويعانىڭ با? ەلدىڭ الدىندا جاۋابىڭدى كەڭىرەك ءتۇسىندىرۋىڭدى تالاپ ەتەمىن… -دەدى جۋرناليست.