«باتىل بول»: دەرەكتى فيلم قازاق ءتىلىن ۇيرەنىپ, كەدەرگىلەردى جەڭۋگە بولاتىنىن كورسەتەدى

فوتو: اشىق دەرەككوز

قازىرگى تاڭدا ۇلتتىق كينو ورتالىعىنىڭ قولداۋىمەن «باتىل بول» دەرەكتى ءفيلمىنىڭ ءوندىرىسى ءجۇرىپ جاتىر. تۋىندى ماڭىزدى تاقىرىپتى – قازاق ءتىلىن مەڭگەرۋ ماسەلەسىن كوتەرەدى. «باتىل بول» ءفيلمى – رەجيسسەر تاتيانا شيشكينانىڭ دەبيۋتتىك جۇمىسى جانە ول مەملەكەتتىك ءتىلدى ۇيرەنۋگە ۇمتىلعان ادامداردىڭ تاجىريبەسىمەن تانىستىرۋدى ماقسات ەتەدى, دەپ جازدى qandastar.kz

ءفيلمنىڭ تاريحى اۆتوردىڭ ءجۇرىپ وتكەن جولىمەن تىكەلەي بايلانىستى. ول قازاق ءتىلىن ۇيرەنۋ ماقساتىندا الماتىدا اشىلعان «باتىل بول» قازاق ءتىلىن ۇيرەتۋ كلۋبىنا جۇگىنگەن. 2022 جىلى كلۋب اشىلعان كۇنى-اق وعان 300-دەن استام ادام ءوتىنىش قالدىرعان. «باتىل بول» كلۋبى ولاردىڭ بارلىعىنىڭ تىلدىك بارەردى ەڭسەرۋىنە اقىسىز سەپتەسكەن. بۇدان سوڭ كلۋبتىڭ وزگە قالالاردا دا فيليالى اشىلىپ, قازاقستاندا تانىمالدىعى ارتقان. ۇيىرمەنىڭ نەگىزىن قالاۋشى – الەكسەي سكالوزۋبوۆ. ول جاستايىنان قازاق ءتىلىن مەڭگەرىپ, كۇندەلىكتى ومىردە قولدانۋدى ارمانداعان. الماتىعا ارمان ارقالاپ, ۇيىرمە اشىپ, ونىڭ ءىسىن ىلگەرىلەتكەن. بۇگىندە ۇيىرمەگە ءتىل ۇيرەنۋگە ىنتا تانىتقان ءاربىر ادام قاتىسا الادى. ونىڭ ىشىندە ءارتۇرلى ەتنيكالىق توپ وكىلدەرى بار. ولار تەك قازاق ءتىلىن عانا ەمەس, حالقىمىزدىڭ سالت-ءداستۇرى مەن ادەت-عۇرپىن ءجىتى زەردەلەۋگە نيەتتى. ءفيلمدى تۇسىرۋگە قوزعاۋ سالعان دا وسى دۇنيە.

تۋىندى اۆتورى تەك بۇل فاكتىلەرمەن عانا شەكتەلمەي, ەلىمىزدەگى ءتىل ۇيرەنۋ ماسەلەسىن تەرەڭ تالداۋعا تىرىسقان. وزگە ۇلت وكىلدەرىنىڭ مەملەكەتتىك ءتىلدى يگەرۋدەگى ىشكى كەدەرگىلەرى مەن قورقىنىشى قاتار قوزعالعان. دەرەكتى ءفيلمنىڭ ءتۇسىرىلىمى الماتىدان بولەك, استانا, اقتاۋ, ورال جانە اتىراۋ قالالارىندا دا جۇرگىزىلدى. مۇندا اۆتور قازاق ءتىلىن ۇيرەنۋگە جانە وزدەرىنىڭ كومپلەكستەرىن جەڭۋگە تالپىنعان ادامداردىڭ پىكىرى مەن سەزىمىن وزگەشە جيناقتايدى.

ايتا كەتەيىك, دەرەكتى فيلم – وتكەن جىلى پيتچينگتەن سۋىرىلىپ شىققان جوبانىڭ ءبىرى.