جاڭالىقتار
ەلىمىزدە باسپانا باعاسى 15 پايىز وسەدى – ساراپشىلار
فوتو: اشىق دەرەككوز
ساراپشىلار ەلىمىزدە كەلەسى جىلى پاتەر قۇنى 10-نان 15 پايىزعا دەيىن كوتەرىلەدى دەگەن بولجام ايتتى. بۇل تۋرالى qandastar.kz اقپارات اگەنتتىگى كتك ارناسىنا سىلتەمە جاساپ حابارلايدى.
باسپانانىڭ قىمباتتاۋىنىڭ سەبەبى قۇرىلىس سالاسىنا 12 پايىزدىق قوسىلعان قۇن سالىعى قايتا ەنگىزىلمەك. ال قۇرىلىس كومپانيالارى سول سالىقتى قالتادان شىعارماس ءۇشىن شارشى مەتر قۇنىنا قوسادى دەيدى ماماندار. سۋ جاڭا ۇيلەردىڭ قۇنى شارىقتاسا, ەسكى پاتەرلەر دە قىمباتتايدى دەگەن ءسوز.
12 پايىزدىق قۇن سالىعى دەگەنىمىز جاڭالىق ەمەس. ەلدەگى قۇرىلىس كومپانيالارى سوناۋ 2001 جىلى وسى سالىقتان بوساتىلعان. وسىلايشا ۇكىمەت ءۇيدىڭ باعاسىن ارزانداتپاق بولدى. ەندى سول سالىق كەلەر جىلدان باستاپ قايتا ەنگىزىلگەلى وتىر. بۇل باعاعا كەرى اسەر ەتەدى دەيدى ساراپشىلار.
قۇرىلىس كومپانيالارىنا جەڭىلدىك بەرىلگەن 2001 جىلدان باستاپ سۋ جاڭا باسپانانىڭ قۇنى 21 ەسە قىمباتتاپتى. قايتاردا بۇل سان تاعى وسكەلى تۇر.
«قازىر قۇرىلىس كومپانياسى ءۇي سالىپ, ورتا ەسەپپەن 15 پايىز پايدا تابادى. ەگەر 12 پايىزدىق سالىق ەنگىزىلەتىن بولسا, قۇرىلىس كومپانياسى نولگە جۇمىس ىستەيدى دەگەن ءسوز. سوندىقتان ولاردا ەكى-اق باعىت بار: پايداسىز ىستەيدى نەمەسە شارشى مەتر باعاسىن كوتەرەدى”, – دەيدى قازاقستان قۇرىلىسشىلار وداعى استانا فيليالىنىڭ ديرەكتورى ۆياچەسلاۆ لازارەۆ.
ارينە, ەكىنشى نۇسقانى تاڭدايتىنى بەلگىلى. وسىلايشا تۇبىندە زاردابىن تارتاتىن — قاراپايىم تۇتىنۋشى. ويتكەنى كەلەسى جىلى جاڭا سالىنعان ۇيلەر اسپاندايتىن بولسا, سايكەسىنشە, ەسكى ۇيلەردىڭ قۇنى دا قاتارلاسىپ قىمباتتايتىنىنا ريەلتورلار سەنىمدى.
«ويتكەنى, ءبىرىنشى ساناتتاعى تۇرعىن ءۇي باعاسى تىم قىمبات بولادى. سايكەسىنشە, ەكىنشى ساناتتاعى ءۇيدىڭ يەسى ەكىنشى ساناتتى ساتىپ, ءبىرىنشى ساناتتاعى پاتەر العىسى كەلەدى عوي. سايكەسىنشە, ەكىنشى ساناتتاعى ءۇي باعاسى سول ءبىرىنشى ساناتتاعى ءۇيدىڭ باعاسىنا قاراي وزگەرەدى. باعاسى وسسە, ساتىپ الۋ مۇمكىندىگى ازايادى. بۇل جالپى جىلجىمايتىن م ۇلىك نارىعىنا تىكەلەي اسەر ەتەدى”, – دەيدى ريەلتور شاحرۋح اسقاروۆ.
تۇرعىن ءۇي نارىعىنىڭ قانداي وزگەرىسكە ۇشىرايتىنىن ۋاقىت كورسەتەدى. بىراق ءدال قازىر پاتەر باعاسى ايتارلىقتاي تۇراقتالىپ قالدى دەيدى ريەلتورلار. الماتىدا 40 شارشى مەتر ءبىر بولمەلى پاتەردىڭ قۇنى شامامەن 25-30 ميلليون تەڭگەنىڭ توڭىرەگىندە. ەندى 12 پايىزدىق سالىق ەنگىزىلسە, ءدال سول ءۇيدىڭ قۇنى قانشاعا شىعاتىنىن كەلەسى جىلى سالىستىرىپ كورەمىز.
ەسكە سالساق, وسىعان دەيىن ەلىمىزدە باسپانانى ساقتاندىرۋ مىندەتتەلەتىنى تۋرالى جازعانبىز.
