ەلىمىزدەگى ەسكى پويىزدار قاشان جاڭارادى?

قىزمەت كورسەتۋ ساپاسى دا سىن كوتەرمەيدى. سول سەبەپتى ەلىمىزدە تەمىرجول پاركىن جاڭارتۋدىڭ جوسپارى قۇرىلىپ, باعدارلامالىق قۇجات قابىلدانباق.  كۇندەلىكتى تىرشىلىكتە الىس-بەرىسپەن قاتار بارىس-كەلىستە شويىنجولدىڭ ورنى بولەك. ايتالىق, بىلتىر ەلىمىزدە 14 ميلليونعا جۋىق ادام پويىزبەن قاتىناعان. الايدا دىتتەگەن جەرىنە دىڭكەلەتىپ جەتكىزەتىن پويىزدىڭ كەيدە ادام ءۇشىن قيامەت-قايىمعا اينالاتىنى بار. قازىر ەلىمىزدە 2600 جولاۋشىلار ۆاگونى بار دەسەك, ونىڭ 2100 ۇلتتىق تاسىمالداۋشىعا تيەسىلى, قالعانى جەكە كومپانيالاردىڭ ەنشىسىندە. بىراق وسى 2600 ۆاگوننىڭ تەڭ جارتىسىنا جۋىعى ەسكىرگەن. توزىعى جەتسە دە, تەمىرجولداردان تۇسپەگەن مۇنداي ۆاگوندار جولاۋشىلار ءۇشىن قولايسىز عانا ەمەس, قاۋىپتى دە. كولىك مينيسترلىگى بولسا, تەمىرجول پاركىن جاڭارتۋ جۇمىستارىنىڭ قولعا الىنىپ, جىل سايىن 100-گە جۋىق جاڭا ۆاگون ساتىپ الىنىپ جاتقانىن العا تارتتى. ءساتجان وزبەكوۆ, قر كولىك مينيسترلىگىنىڭ تەمىرجول ينفراقۇرىلىمى باسقارماسىنىڭ باسشىسى: — وسى جىلى دا 100-دەن اسا ۆاگون ساتىپ الامىز دەپ جوسپارلاپ وتىرمىز. 2025 جىلعا دەيىن 300-گە جۋىق ۆاگون ساتىپ الىنادى. سونىمەن قاتار, وزدەرىڭىز بىلەتىندەي, بىزدە قازىر Stadler كومپانياسىمەن بىرلەسىپ, وتاندىق ۆاگون ءوندىرىسىن جاڭارتىپ, قازىرگى زامانعا ساي ۆاگوندار ءوندىرىسىن قالىپتاستىرۋ جۇمىستارى ءجۇرىپ جاتىر. 2025 جىلدان باستاپ سول ۆاگوندار ىسكە قوسىلاتىن بولادى. جالپى 2029 جىلعا دەيىن Stadler تەحنولوگياسىمەن 500-گە جۋىق ۆاگون ساتىپ الىنايىن دەپ وتىر. ەلىمىزدەگى جۇك ۆاگوندارىنىڭ دا جاعدايى جىلارمان كۇيدە. تاۋار اينالىمى تاسىمالىنىڭ مەجەدەن تومەن بولۋى مەن تەمىرجول بويىندا ءتۇرلى اپاتتاردىڭ ورىن الۋىنا جۇك ۆاگوندارىنىڭ ەسكىرۋى سەبەپ. ايتالىق, قازىرگى تاڭدا ەلىمىزدە 136 مىڭ جۇك ۆاگونى بار بولسا, ونىڭ 44%-ءىنىڭ توزىعى جەتكەن. كەڭەستىك كەزەڭنەن قالعان ەسكى ۆاگونداردى جاڭارتۋعا مەملەكەت تاراپىنان كومەك كورسەتىلىپ جاتىر. ونىڭ شەڭبەرىندە بىلتىر 3 مىڭ سۋ جاڭا ۆاگون ساتىپ الۋعا كەلىسىمشارت جاسالعان. ءساتجان وزبەكوۆ, قر كولىك مينيسترلىگىنىڭ تەمىرجول ينفراقۇرىلىمى باسقارماسىنىڭ باسشىسى: — ودان بولەك, قتج ءوز قاراجاتى ەسەبىنەن لوكوموتيۆتەر پاركىن جاڭارتىپ جاتىر. بىلتىر 113 لوكوموتيۆ ساتىپ الىندى. الداعى 2030 جىلعا دەيىن 600 لوكوموتيۆ ساتىپ الىنادى دەگەن جوسپار بار. كولىك-كوممۋنيكاتسيا جۇيەسىن جەتىلدىرۋدىڭ اياسىندا سالادا تسيفرلاندىرۋعا باسىمدىق بەرىلگەن. قازىرگى تاڭدا تەمىرجول سالاسىنداعى 100-دەن استام قىزمەت اۆتوماتتاندىرىلعان. جۇك تاسىمالىن جۇزەگە اسىراتىن كومپانيالار ءۇشىن كەلىسىمشارتتى جاساۋ مەن ءوتىنىش بەرۋ ءتارتىبى تولىعىمەن تسيفرلاندىرىلعان. تەمىرجولعا IT باسقارۋ جۇيەسىن ەنگىزۋدە ورتالىق ازيادا قازاقستان كوش باسىندا كەلەدى. نۇربول نۇرعاليەۆ, «قتج» ۇك» اق اۆتوماتتاندىرۋ جانە تسيفرلاندىرۋ فيليالىنىڭ ديرەكتورى: — رەسەيمەن دە ەلەكتروندى دوكۋمەنتكە كوشكەنبىز. رەسەيمەن 69% قۇجاتىمىزدىڭ ءبارى ەلەكتروندى تۇردە ازىرلەنەدى. جالپى قازاقستاننىڭ ىشكى تاسىمالىندا 99% ەلەكتروندى جۇيەگە اۋىسقانبىز. بۇگىنگى تاڭدا ءبىزدىڭ 2023 جىلى 75% بۇكىل بيلەت ەلەكتروندى تۇردە الىنعان. تەمىرجول سالاسىن قارقىندى تۇردە تسيفرلاندىرۋدى پرەزيدەنتتىڭ ءوزى تاپسىردى. بۇل قادام ونىڭ تيىمدىلىگى مەن ونىمدىلىگىن ەداۋىر ارتتىرۋعا, بيۋدجەت قاراجاتىن ۇنەمدەۋگە مۇمكىندىك بەرەدى. ال وتاندىق كاسىپكەرلەر ءۇشىن جۇمىس جاعدايى ەداۋىر جەڭىلدەي تۇسپەك. تەمىرلان جاميتوۆ, تاسىمالداۋشى كومپانيا وكىلى: — ءبىز وتاندىق اۋىلشارۋاشىلىق ونىمدەرىن ەكسپورتقا شىعارامىز. بۇرىن قۇجاتتاردىڭ بارلىعىن قولمەن تولتىرىپ, ۋاقىت جوعالتاتىنبىز. قازىر ءبىزدىڭ قىزمەتكەرلەرىمىز وسكەمەندەگى كەڭسەدەن بارلىق پروتسەستەردى ەلەكتروندى تۇردە باسقارادى. وتىنىشتەردى ءتىپتى ۇيالى تەلەفونداعى قوسىمشا ارقىلى بەرۋگە بولادى. ستانتسياعا بارىپ, تاۋارلىق كاسسادا تۇرۋدىڭ قاجەتى جوق. بۇل كاسىپكەرلەرگە وتە ىڭعايلى. تەمىرجول سالاسىندا ءالى دە قوردالانعان ماسەلە كوپ. جۇرۋىنەن تۇرۋى كوپ پويىزدارعا جولاۋشىلاردىڭ وكىپەسى قارا قازانداي. ۆاگوندارداعى تازالىق جاعدايى مەن قىزمەت ساپاسى دا سىن كوتەرمەي تۇر. جولاۋشىلار بولسا, اقىسىنا ساپاسى ساي جۇردەك پويىزبەن جۇيتكيتىن كۇن الىس ەمەستىگىنە ءۇمىتتى.