«Er adamǵa ıilip amandasý kerek»: Almatydaǵy Abaı ýnıversıtetiniń qyzdarǵa ótkizgen jıyny kóptiń ashýyn týǵyzdy

Foto: Qumash Telegram-arnasy

Almatydaǵy Abaı atyndaǵy Qazaq ulttyq pedagogıkalyq ýnıversıteti stýdent qyzdarǵa er adamnyń aldynda ózin ustaý, kıiný jáne sóıleý týraly jıyn ótkizgen, dep jazdy qandastar.kz

Bul týraly Stan.kz aqparat agenttigi habarlaıdy.

Abaı atyndaǵy Qazaq ulttyq pedagogıkalyq ýnıversıteti stýdent qyzdardy jınap, ózderin qalaı ustaý keregi týraly nasıhat jasaǵan. Muny stýdent qyz Qumash Telegram-arnasyna málimdegen.

“Ýnıversıtet ákimshiligi birinshi kýrstyń barlyq qyzyn ıaǵnı 40-50 adamdy jınap, qyz balasy ınabatty, ıbaly bolý kerek degen plakattardy ilgen. Sodan keıin ártúrli jastaǵy er adamdar qyzdardyń minez-qulqy týraly aıtqan vıdeorolıkterin qosqan”, – delingen arnada.

Stýdenttiń aıtýynsha, vıdeonyń negizgi tezısi qyzdar ashyq-shashyq kıinbeý keregin, qatty daýys shyǵaryp sóılemeýi tıis ekenin, er adamdardy kórgende, ıilip sálemdesý keregin túsindiredi. Sondaı-aq uzyn beldemshe kııý ádeptilik belgisi dep aıtqan.

Sonymen qatar aǵa oqytýshy eýropalyq áıelderge elikteýge bolmaıtynyn aıtqan. Olardyń shamadan tys erkindiginen LGBT jáne basqa da nárseler keń taralǵanyn aıtty. Olardy jıynnan shyǵarmaı qoıypty.

Bul jıyn jeli qoldanýshylarynyń narazylyǵyn týdyrdy.

“Jigitterdiń qandaı bolý keregi týraly da jıyn ótkizińizdershi”, “Áıelderdi jaıyna qaldyryńyzdar. Bizdi tárbıelep, aqyl aıtýdy doǵaryńyzdar. Qyzdar óz ómirine ózi jaýapkershilik ala alady. Erlerge ózin-ózi ustaýdy úıretińizder”, “Erlerge qol kótermeý, urmaý, zorlamaý jáne balalaryn tastamaý týraly aqyl aıtqan durysyraq” dep jazdy jelidegiler.

Stan.kz tilshisi jaǵdaıǵa qatysty ýnıversıtetten pikir surady. Baspasóz hatshysy bul jıyn ulttyq qundylyqty dáripteý maqsatynda ótkenin aıtady. Sózderinshe, mundaı jıyndar olarda turaqty túrde ótedi.

“5 mamyrda ýnıversıtet qabyrǵasynda stýdentterge arnalǵan jalpy tárbıelik baǵyttaǵy kezdesýlerdiń biri ótti. Osy ýaqytqa deıin olarǵa qatysty qandaı da bir syn bolǵan emes.

Atalmysh is-sharanyń da negizgi maqsaty – ulttyq qundylyqtardy dáripteý, jastardyń mádenı-ádeptilik sana-sezimin arttyrý jáne etıkalyq normalardy túsindirý.

Kezdesý barysynda kórsetilgen vıdeo keıbir qatysýshylarǵa basqasha áser etip, olardyń arasynda birjaqty pikir týǵyzǵan. Ýnıversıtet ákimshiligi bul jaǵdaıǵa túsinistikpen qarap, aldaǵy ýaqytta mundaı mazmundaǵy materıaldardy tańdaýda barynsha muqııat bolady. Abaı ýnıversıteti – zaıyrly bilim berý mekemesi. Biz stýdentterdiń jeke tańdaýyna, erkindigine jáne pikir alýandyǵyna qurmetpen qaraımyz”, – delingen habarlamada.

Ýnıversıtet ujymy stýdenttermen ashyq dıalogqa árdaıym daıyn ekenin jáne olardyń pikirin eskerýge múddeli ekenin atap ótti.