جاڭالىقتار
گەنەرال-مايور: جاستاردى كوشەدە كۇشپەن ۇستاپ, اسكەرگە جىبەرۋ زاڭسىز
فوتو: ۆيدەودان سكرين
قر قورعانىس مينيسترلىگى كادر دەپارتامەنتىنىڭ ەكس-باسشىسى گەنەرال-مايور قايرات كوپباەۆ Adal Adam Youtube ارناسىنا بەرگەن سۇحباتىندا جاستاردى كوشەدەن كۇشپەن ۇستاپ اكەتۋ – باس بوستاندىعىنان ايىرۋمەن بىردەي ەكەنىن ايتتى, دەپ جازادى qandastar.kz
«بۇل – اناحرونيزم. مەن تۇبەگەيلى قارسىمىن. تىڭدايتىن قۇلاق بولسا, ءوزىمنىڭ اقىلىمدى ايتار ەدىم. كوشەدە ۇستاپ, شاقىرۋ پۋنكتىنە اپارىپ, شاشىن الىپ, دارىگەرلىك كوميسسيادان وتكىزىپ, اسكەرگە جىبەرۋ – مۇلدە دۇرىس ەمەس. ءبىز باسقا مەحانيزم قولدانۋىمىز كەرەك. ال زاڭ جاعىنا كەلگەندە, بۇل زاڭبۇزۋشىلىق. ياعني, زاڭسىز باس بوستاندىعىنان ايىرۋمەن بىردەي. ەگەر ۇيىنە بارا جاتقان ادامدى ۇستاپ, ءوز ەركىنسىز اسكەرگە جىبەرەتىن بولسا, وندا زاڭمەن بەكىتىپ الۋ كەرەك. وسى ءتاسىل قۇپ كورسە, زاڭداستىرۋ كەرەك. كەزىندە اسكەردەن جۇيەلى تۇردە قاشاتىنداردى اكىمشىلىك ەمەس, قىلمىستىق جاۋاپكەرشىلىككە تارتاتىن. مۇمكىن, وسى نورمانى جاڭارتۋ كەرەك شىعار», – دەدى بۇرىنعى گەنەرال-مايور.
قايرات كوپباەۆتىڭ ايتۋىنشا, اسكەري-پاتريوتتىق تاربيەنى مەكتەپ جاسىنان ساپالى جۇرگىزۋ كەرەك جانە جاستار اسكەرگە ءوز ەركىمەن باراتىنداي كەشەندى جۇمىستار جاسالۋى كەرەك.
«پاتريوتتىق سەزىمدى اسكەردىڭ الدىندا نەمەسە ءبىر جۇمادا بويىنا ۇيالاتا المايسىز. مەكتەپ قابىرعاسىندا جۇرگەندە قالىپتاسۋ كەرەك. سول مەزەتتە تاربيەلەپ, جۇرەگىمەن سەزىنۋ كەرەك. ءبىزدىڭ ۋاقىتىمىزدا ميىمىزعا قۇياتىن, «اسكەرگە بارۋ – سەنىڭ مىندەتىڭ» دەيتىن. اسكەري بورىش – كونستيتۋتسيادا بەكىتىلگەن, مىندەت, پارىز. ول قۇقىق ەمەس. وسى ورايدا, ازاماتتاردى اسكەرگە تارتۋعا باسقا تاسىلدەردى قولدانۋ كەرەك. ال, ەندى كوشەدە پوليتسەيلەرمەن قولىن بۇراپ, الىپ كەتۋ مۇلدە دۇرىس ەمەس. جاستاردىڭ بويىنا ءوز ەركىمەن بورىشىن وتەيتىندەي اسكەري-پاتريوتتىق سەزىمىن وياتۋعا ءتيىسپىز, ولاردى كىنالاي بەرۋدىڭ قاجەتى جوق. قيناپ اسكەرگە جىبەرۋ ءتيىمسىز ءتاسىل», – دەدى قايرات كوپباەۆ.
