جاڭالىقتار
«گۋمانيتارلىق كومەك – ەكىجاقتى نارسە»: «دالا قىراندارى» بىرلەستىگىنىڭ ۇيلەستىرۋشىسى تاسقىننان زارداپ شەككەندەرگە قاجەت زاتتاردى اتادى
ات باسىنا كۇن تۋسا, اۋىزدىقپەن سۋ ىشەر, ەر باسىنا كۇن تۋسا, ەتىگىمەن سۋ كەشەر دەمەكشى بيىلعى كوكتەم ەرلەر مەن ەرىكتىلەر ءۇشىن وڭاي بولماي تۇر. ەلىمىزدىڭ كوپ ءوڭىرىن سۋ باسقالى بەرى ەرلەرىمىز بەلۋاردان سۋ كەشىپ, كومەككە بىلەك سىبانا كىرىسىپ ءجۇر. سولاردىڭ ءبىرى «دالا قىراندارى» جاستار قوعامدىق بىرلەستىگىنىڭ مۇشەلەرى. «Qasqa Jol» يۋتۋب-ارناسى ءوزىنىڭ كەزەكتى ءبولىمىن ءدال وسى بىرلەستىكتىڭ جىگىتتەرىنە ارنادى. مەرەي اقشالوۆ, اسحات دىلمۇحامەدوۆ, نۇرحات وراش باستاعان ۇيلەستىرۋشىلەر سۋ تاسقىنىنا قاتىستى ءبىراز ماسەلەنىڭ ءتۇيىنىن تارقاتتى
ءسوزدىڭ باسىن بەيجىن وليمپايادسىنىڭ قاتىسۋشىسى مەرەي اقشالوۆ باستادى.
«سۋ تاسقىنى كەزىندە قوياندىعا باردىم. مەن بارعان ۋاقىتتا قار ەندى ەرىپ جاتتى. ەرىگەن قار سۋى ۇيگە كىرمەسە دە اۋماقتاردى الىپ جاتىر ەكەن. سول قاردى ارشىدىق».
مەرەيدىڭ ءسوزىن «دالا قىراندارى» بىرلەستىگىنىڭ ۇيلەستىرۋشىسى نۇرحات وراش جالعادى. ايتۋىنشا, باسىندا قوياندىعى كومەككە بارعان جىگىتتەر ءارى قاراي قول ۇشىن جىبەك جولى حالقىنا سوزعان.
«قوياندىعا بارعاندا سۋ تىزەدەن كەلىپ جاتتى. سول سۋ ورتالىق كوشەنى دە باسىپ جاتىر. قىس بويى جالعىزباستى جانە مۇگەدەك قاريالار, انالار ۋاقىتىلى قاردى شىعارا الماي سۋدا قالعان. استانادا سول كەزدەرى قاتتى جىلىنۋ بولدى. قاپىل ەرىگەن كەزدە ونىڭ ءبارى ۇيلەرگە كىرەتىن ەدى. ءبىز سونىڭ الدىن الۋ ءۇشىن قولىمىزعا كۇرەك الىپ قوياندىنى قاردان تازالادىق. جاستارىمىز قاردى سۋدىڭ كەتىپ جاتقان ارناسىنا تاستادى. وسىنىڭ ارقاسىندا بىرنەشە ءۇي سۋ باسۋدان امان قالدى. بۇل قىراندار ءۇشىن دە العاشقى تاجىريبە بولدى. وسىدان كەيىن ءبىز تايتوبەگە باردىق. ول جاقتا جاعداي كۇردەلى ەدى. قاپشىقپەن قۇم تاسۋعا تۋرا كەلدى. ودان كەيىن جىگىتتەرىمىز جىبەك جولىنا باردى. وسى جەردە ءبىزدى قۋانتقان ءبىر جايت بار. العاشقى كۇندەرى ءوزىمىز جانە جەرگىلىكتى حالىق پەن اكىمدىك شاپقىلاعان بولسا كەيىننەن مەملەكەت تاراپىنان ۇلكەن قولداۋ بولدى. مەملەكەت ءتورت جۇزگە جۋىق اسكەر جىبەرىپ, جاعدايدى نازاردان تىس قالدىرمادى».
وسى ورايدا قول ۇشىن سوزىپ, حالىقتىڭ جانىنان تابىلعان نۇرحات وراش گۋمانيتارلىق كومەككە كەڭىرەك توقتالدى. سوزىنشە كەرەك تە, كەرەك ەمەس تە دۇنيەلەر بار.
«گۋمانيتارلىق كومەك – ەكىجاقتى نارسە. قازىر كومەك رەتىندە كوپتەپ ازىق-ت ۇلىك بارىپ جاتىر. بىراق ونىڭ ءبارى حالىققا ۇيلەرى قالپىنا كەلگەن سوڭ عانا قاجەت بولادى. ەۆاكۋاتسيالىق پۋنكتە وتىرعان حالىق ۇننان نان پىسىرە المايدى. ءبىز حارداپ شەككەن ءوڭىر حالقىمەن بايلانىستامىز. ولارعا قازىر ەڭ كەرەگى – ۇرمەلى قايىق. ەكىنشى دۇنيە – بالىققا شىعاتىن ادامدار كيەتىن رەزەڭكە ەتىك. سەبەبى سۋ دەڭگەيى جوعارى. ءۇشىنشىسى – ءدارى-دارمەك. ودان كەيىن قۇتقارۋ جيلەتتەرى جانە الىستى الاتىن شامدار. پوليەتيلەن پاكەتتەرى دە تاپتىرمايتىن زات. ولار بارريكادا جاساۋعا كەرەك. ءبىز وسى زاتتاردى شتابتا قاراستىرىپ جاتىرمىز. جىگىتتەر ورالعا باراتىن كەزدە وزدەرىمەن بىرگە الا كەتەدى».
مەرەي اقشالوۆتىڭ ايتۋىنشا, قىرانداردىڭ قاتارىنا قوسىلعىسى كەلەتىن ءار ادامعا ەسىك اشىق.
«بىزگە قوسىلعىسى كەلەتىندەرگە ارقاشان ەسىك اشىق. ءبىز قانداي دا ءبىر جەرگە بارار الدىندا ۆيدەوۇندەۋ جاسايمىز. گەيدار اليەۆ, 14 كوشەسىندە ءوز شتابىمىز بار. ۆيدەوۇندەۋدى كورىپ كەلىپ جاتقان ادامدار جوق ەمەس».
مەرەيدىڭ ءسوزىن تولىقتىرعان نۇرحاتتىڭ ايتۋىنشا, ولار قاتارىنا قوسىلعان ءار ادامنىڭ قاۋىپسىزدىگىنە جاۋاپتى.
«كەز كەلگەن كومەك بەرگىسى كەلەتىن ادام تىركەلە الادى. شتابتا ولاردى وقىتۋدان وتكىزەدى. ويتكەنى توتەنشە جاعداي كەزىندە ءوزىن قالاي ۇستاۋدى ۇيرەنۋى كەرەك. سودان كەيىن بارىپ قانا ءبىز ول ادامداردى قاتارىمىزعا قوسا الامىز. سەبەبى جاۋاپكەرشىلىك دەگەن دۇنيە بار. بۇدان بولەك ۇيلەستىرۋ جۇمىستارىن جۇرگىزىپ, اركىم ءوز ورنىن بەلگىلەپ الدى. ءبىرىمىز تجد-مەن بايلانىستا بولساق, ءبىرىمىز قىرانداردىڭ كەلىپ-كەتۋىن قامتاماسىز ەتىپ وتىرمىز. قازىر ءبىز جۇمىس جۇيەسىن قۇرىپ الدىق».
لوندون وليمپياداسىنىڭ قاتىسۋشىسى اسحات دىلمۇحامەدوۆتىڭ سوزىنشە, قىراندار تابيعي اپات جاقىن ورال قالاسىنا اتتانعالى وتىر ەكەن.
«استانانىڭ ماڭايى ءبىز ءۇشىن كىشىگىم تاجىريبە بولدى. بارلىعىمىزعا ءمالىم ورالعا ۇلكەن سۋ كەلە جاتىر. سول ءۇشىن كوماندانىڭ جارتىسى بولىپ ورال قالاسىنا اتتانعالى وتىرمىز».
نۇرحات وراش ورالداعى ۇلكەن سۋعا قارسى كومەك بارا جاتقانىن ايتتى. ولاردىڭ قاتارىندا ەل نامىسىن قورعاپ جۇرگەن سپورتشىلارىمىز دا بار ەكەن.
«ءبىز ءار سپورت فەدەراتسياسىنا ۇندەۋ تاستادىق. سپورشىلار بولىپ ورال قالاسىنا بارىپ كومەك كورسەتەيىك دەگەن وي ايتتىق. ونى ەستىگەن سپورتشىلار ءوز كومەكتەرىن كورسەتۋگە دايىن ەكەندەرىن جەتكىزدى. العاشقى 30 ادام استانادان شىعادى. وڭتۇستىك ايماقتىڭ سپورتشىلارى ءوز كۇشتەرىمەن ورالعا بارادى. قازىر ول جاققا جۇمىس كۇشى اۋاداي قاجەت».
