عىلىمي-پەداگوگيكالىق ساراپشىلار بازاسىنا ۇمىتكەرلەردى قابىلداۋ باستالدى

فوتو: اشىق دەرەككوز

رەسپۋبليكالىق عىلىمي-تاجىريبەلىك ءبىلىم مازمۇنىن ساراپتاۋ ورتالىعى 17-30 جەلتوقسان ارالىعىندا وقۋ باعدارلامالارى, وقۋلىقتار جانە وقۋ-ادىستەمەلىك كەشەندەردى ساراپتاۋ ءۇشىن مامانداردى ىرىكتەۋ كونكۋرسىن جاريالايدى. قاتىسۋعا پەداگوگ-زەرتتەۋشى نەمەسە ودان جوعارى بىلىكتىلىگى بار كانديداتتار شاقىرىلادى, دەپ جازدى qandastar.kz

ماقساتى — ءبىلىم بەرۋ سالاسىندا وقۋ ماتەريالدارىنىڭ ساپاسىن باعالاۋ جانە تالداۋ ءۇشىن كاسىبي مامانداردى تارتۋ.

ساراپشىلار بازاسىنا قابىلدانۋ ءۇشىن قاجەتتى ءىس-شارالار:

• E-EXPERT.GOV.KZ پورتالى ارقىلى قاجەتتى قۇجاتتار مەن ءوتىنىشتى تاپسىرۋ;
• تەستىلەۋ — كاسىبي قۇزىرەتتەردى تەكسەرۋ كەزەڭدەرى;
• سۇحبات — كاسىبي تاجىريبەنى, موتيۆاتسيامەن ءبىلىم بەرۋ پروتسەسىن ءتۇسىنۋدى انىقتاۋ ءۇشىن جەكە اڭگىمەلەسۋ;
• ەسسە جازۋ — ويدى ناقتى ءارى دايەكتى تۇردە ءبىلدىرۋ جانە ءوز پىكىرىن دۇرىس دالەلدەۋ داعدىلارىن كورسەتۋ.

بارلىق كەزەڭدەردەن ءساتتى وتكەن ۇمىتكەرلەر وقۋدان وتەدى. كۋرستاردىڭ ۇزاقتىعى 360 ساعاتتى قۇرايدى. باعدارلاما وقۋ ماتەريالدارىنىڭ ساپاسىن باعالاۋعا قاتىستى قۇزىرەتتەردى دامىتۋعا باعىتتالعان. وقۋ بارىسىندا ۇمىتكەرلەر ساراپتامالىق شەشىم ازىرلەۋ بويىنشا تەوريالىق ءبىلىم مەن پراكتيكالىق داعدىلاردى مەڭگەرەدى.

وقۋدى اياقتاعاننان كەيىن قاتىسۋشىلار 5 جىل مەرزىمگە جارامدى سەرتيفيكات الادى. سونداي-اق, قاتىسۋشىلار ءبىلىم بەرۋ ماتەريالدارىن ساراپتاۋعا ءارى باعالاۋعا بەلسەنە قاتىسىپ, كاسىبي بىلىكتىلىگىن ارتتىرادى جانە مانساپتىق مۇمكىندىكتەرىن كەڭەيتەدى.

ءوتىنىم بەرۋ ءۇشىن E-EXPERT.GOV.KZ سايتىنان تولىق مالىمەت الۋعا بولادى.