«قازاقستان حالقىنا» قوعامدىق قورى باتىس قازاقستاندا 114 تۇرعىن ءۇي سالماق

مەموراندۋم اياسىندا قوردىڭ قارجى رەسۋرستارى ەسەبىنەن جەرگىلىكتى اتقارۋشى ورگاندار ۇسىنعان ۇلگىلىك جوبا نەگىزىندە 114 تۇرعىن ءۇي سالىنادى. اتالعان قوردان تۇسكەن مالىمەتكە قاراعاندا, سىرىم اۋدانى جىمپيتى اۋىلىندا – 49, بۇلدىرتىدا – 25, ولەڭتىدە – 38, جەتىكولدە – 1 جانە جاڭاقونىستا 1 ءۇي بوي كوتەرمەكشى. وسى ەلدى مەكەندەردە سۋ تاسقىنىنان زارداپ شەككەن سونشاما ءۇي وبەكتيۆتى تەكسەرۋ قورىتىندىسى بويىنشا جوندەۋگە جاتپايدى جانە تۇرۋعا جارامسىز.

باتىس قازاقستان وبلىسىنىڭ اكىمدىگى سۋ باسپايتىن اۋماقتاردا جاڭا ۇيلەر سالۋ ءۇشىن جەر ۋچاسكەلەرىن انىقتادى جانە ءبولدى. سونداي-اق قاجەتتى ينجەنەرلىك ينفراقۇرىلىمدى جۇرگىزەدى. ورىندالاتىن قۇرىلىس جۇمىستارىنىڭ بارىسى مەن ساپاسىن وبلىس اكىمدىگى جەرگىلىكتى قوعامدىق بەلسەندىلەرمەن بىرلەسىپ باقىلايتىن بولادى.

«ءبىزدىڭ جەرىمىز, حالقىمىز تابيعي اپاتقا تاپ بولدى, ونىڭ سالدارى, ارينە وتە اۋىر. بىراق, ءبىز ورتاق كۇش-جىگەرىمىزبەن قىسقا مەرزىمدە جاڭا ۇيلەر قۇرىلىسىن باستاپ, ولاردى تولىقتاي ءبىتىرىپ, قيىنشىلىققا تاپ بولعان وتانداستارىمىزعا كومەكتەسە الامىز دەپ ۇمىتتەنەمىز. قور بۇعان قامقورشىلىق كەڭەستىڭ شەشىمى بويىنشا 10 ملرد تەڭگەنى بولۋمەن بىرگە قايىرىمدى قازاقستاندىقتار مەن بيزنەس وكىلدەرى جىبەرىپ وتىرعان قاراجاتتى قوسىمشا قاراستىرىپ وتىر», — دەپ اتاپ ءوتتى «قازاقستان حالقىنا» قق توراعاسىنىڭ ورىنباسارى ءلاززات شىڭعىسباەۆا.

سونىمەن قاتار جاقىن ۋاقىتتا سولتۇستىك قازاقستان, قوستاناي, اقتوبە جانە اقمولا وبلىستارىندا قۇرىلىس ءۇشىن اۋىلدار مەن اۋماقتار انىقتالىپ, ءتيىستى مەموراندۋمعا قول قويىلادى.

«مەملەكەت باسشىسى سۋ تاسقىنىنان زارداپ شەككەن تۇرعىنداردى باسپانامەن قامتۋدى تاپسىرعان بولاتىن. وسى رەتتە, «قازاقستان حالقىنا» قورى دا كومەك كورسەتكەلى وتىر. وسىلايشا, وبلىسىمىزدىڭ سىرىم اۋدانىندا تۇرعىن ۇيلەر سالىنادى. بۇل – قۋانتارلىق جاعداي. زارداپ شەككەن تۇرعىندار باسپاناسىز قالمايدى, مەملەكەت تاراپىنان بارىنشا كومەك بەرىلەدى» — دەدى بقو اكىمى ناريمان تورەعاليەۆ.

«ەسكەرەتىن جايت, 1-30 ءساۋىر ارالىعىندا قوردىڭ اتىنا تۇسكەن بارلىق اقشالاي قاراجات توتەنشە جاعدايدىڭ سالدارىن جويۋعا جانە اۋىلدىق جەرلەردە تۇرعىن ءۇي سالۋعا باعىتتالاتىن بولادى. قور ءوزىنىڭ رەسمي سايتىندا دونورلار مەن اتالعان سومالاردىڭ مولشەرى تۋرالى ەسەپتى ورنالاستىرادى. كۇنى بۇگىن قوردىڭ شوتتارىنا 2,9 ملرد تەڭگە كولەمىندە قايىرىمدىلىق جارنالارى ءتۇستى. قور ءساۋىر ايىنىڭ سوڭىنا دەيىن قايىرىمدىلىق قاراجاتى ەسەبىنەن سالىناتىن ۇيلەردىڭ سانى ارتادى دەپ ۇمىتتەنەدى. قور قايىرىمدىلىق ءۇشىن تەك قوردىڭ رەسمي سايتىندا كورسەتىلگەن شوتتار مەن دەرەكتەمەلەردى پايدالانۋدى سۇرايدى. جەكە تۇلعالار اۋدارىمداردى بانكتەردىڭ ءموبيلدى قوسىمشالارىندا «قايىرىمدىلىق» ءبولىمى ارقىلى جۇزەگە اسىرا الادى», — دەپ حابارلادى ۆەدومستۆودان.

ەسكە سالا كەتەيىك, بۇدان بۇرىن باتىس قازاقستاندا تۇرۋعا جارامسىز دەپ تانىلعان 400-گە جۋىق ءۇي قايتا سالىناتىنىن جازعان بولاتىنبىز.